1-қыркүйек күні еліміздің барлық мектептерінде алғашқы қоңырау салтанаты өткізілді. Білім күніне орай қаламызда жаңа мектеп оқушыларға есігін айқара ашты.
Облыс әкімінің бірінші орынбасары Серік Қожаниязов пен облыстық білім басқармасының басшысы Мейрамбек Шермағанбет «Orda School» жеке мектебінің ашылу салтанатына қатысты.
– Баршаңызды 1 қыркүйек – білім күнімен шын жүректен құттықтаймын! Облыс көлемінде оқушылар саны өткен жылмен салыстырғанда бес мыңға артып, алғаш мектеп табалдырығын 18 мыңға жуық бүлдіршін аттап отыр. Осы орайда аймақта мектептер желісі жылдан-жылға көбейіп келеді. Соның бірі – жаңадан ашылып жатқан «Orda School» жеке мектебі. Бұл білім ордасының перспективасы зор деп білеміз. Себебі жеке инвестиция есебінен салынған мектеп жан басына шаққандағы қаржыландыру есебінен жүзеге асатын нәтижелі жобаның бірі. Әрбір ата-ана баласының заманауи ғимаратта оқып, білімді болғанын қалайды. Бүгін, міне, осы білім ордасының табалдырығын 300-ден аса бала аттап отыр. Балаларымыздың болашағы зор болсын, – деді облыс әкімінің орынбасары.
Жаңа мектептің лентасын облыс әкімінің бірінші орынбасары ата-аналар комитетінің төрайымы және ардагер ұстаздар қиды. Олар мектеп фойесінде оқушылармен кездесіп, оқу ошағының материалдық-техникалық базасымен танысты. Мектеп заманауи үлгіде салынған.
– Жаңа ғимараттың аумағы 4000 шаршы метрді құрайды. 400 орындық білім ұясында 33 оқу кабинеті, денешынықтыру, акт залдары бар. 33 білікті педагог сабақ беретін оқу ордасында 1-9 сынып аралығындағы 300-ден аса оқушы тегін білім алатын болады, – деді мектеп директоры Рауаш Алиқызы
Биыл аймақта 6 жаңа мектеп пайдалануға беріледі. Жаңа оқу жылының қарсаңында 3 жаңа мектеп ашылса, жыл соңына дейін 5 мемлекеттік және 1 жеке мектепті пайдалануға беру жоспарланып отыр. Мұнан бөлек, бірнеше жылдан бері жөндеуді қажет еткен 6 білім беру нысаны жаңарып, жөндеу жүргізілуде.
А.АЙТЖАН
Жылдам ақпарат алу үшін Facebook, Instagram желілері мен Telegram каналымызға жазылыңыз!