Қазіргі таңда қоғамда ашынатын оқиғаның көптігі жасырын емес. Халқымыз бұрыннан сөз қадірін түсінетін, ортақ мәмілеге келе білетін текті елдің сынығы. Осы кезде жағымсыз оқиғалар мен заңсыз жағдайларды шешу үшін сот әділдігіне жүгінеді. Ал былтырғы жылы қандай жұмыстар атқарылды?
Қызылорда қалалық соты өткен жылға қорытынды жасады. Жиынға Қызылорда қалалық сотының төрағасы Дархан Кентбаев пен кеңсе меңгерушісі Айнұр Қараманова қатысты. Сонымен қатар кездесуде азаматтық істер жөніндегі сот төрелігін жүзеге асыру бойынша қорытындымен бөлісті.
– 2022 жылдың он екі айында сот бұйрығын қабылдау арқылы 1118 азаматтық іс қаралды, ал 2021 жылдың он екі айында 1331 азаматтық іспен жұмыс жасалды. Сондай-ақ қаралған азаматтық істер бойынша 45 жеке ұйғарым орын алса, оның алдында 63 жеке ұйғарым қабылданған. Салыстырмалы түрде бұл көрсеткіш азайды. Қазіргі күні көбіне неке және отбасы, тұрғын үй қатынастарымен жұмыс көп атқарылады. Дауларды сотқа дейінгі татуластыру рәсімімен шешуге тырысамыз – деді Дархан Кентбаев.
Жиында жыл бойы қалалық сотта қаралған кейбір істердің бұзылғаны, одан кейін қайта қаралғаны жайлы айтылды. 20 іс тоқтатылып, 11 іс қайта басталған.
Өңірде медиация рәсімін кеңінен қолдану бойынша атқарылған жұмыстар оң нәтижесін беруде. Бүгінде айтысудан шаршаған іс тараптарының өзара келісімге келіп, адамгершілік қатынастары бекемделе түсіпті. Татуластырушы-судья көмегімен шешімі табылған істердің саны көбейген. Өткен жылы төреші Зәбира Абылайқызымен 389 азаматтық іс медиация тәртібімен сәтті аяқталған.
Кездесуде қоғамдағы алаяқтардың айласы жайлы да сөз болды. Шынайы кейіпте көрініп, жалған сөйлеп, адамдарды тақырға отырғызып кететін сұмпайылар ісі де жиі орын алуда. Бұл жағдай ортақ шешіммен шешілуі екіталай. Жәбірленуші тараппен байланысып, зиян тигізген адамды аса ауыр қызметпен ісін қарайтыны жайлы басшы өз ойын жеткізді.
Жиында көбіне татуластыру рәсімін дамыту жайлы айтылды. Күнделікті 20-ға жуық отбасы ажырасуға арыз тастайтыны белгілі болды. Қалалық сот төрағасы аталған қиындықты азайту үшін жұмыс атқарылып жатқанын жеткізді.
Нұрдәурен Жәрдемхан
Жылдам ақпарат алу үшін Facebook, Instagram желілері мен Telegram каналымызға жазылыңыз!