Қымыздың қасиетін қазақтан артық білетін ешкім жоқ. Ұлттық сусынның қадір-қасиетін талай ақын жырлады, қазақтың қымыз дайындауы мен құтты қонағына ұсынуы талай шығармаларға арқау болғаны да белгілі.
«Ал, ішіңдер,
Бұл – қымыз.
Бұл қымыздың арғы атасын сұрасаң,
Құлаша қулық бие сүті еді,
Томсарған ер қазақтың асы еді.
Бұл қымызды кім ішсін?
Бұл қымызды
Айлы күні айналған,
Бұлтты күні толғанған,
Құрығын қу найзадай таянған,
Томсарған ер қазақтың өзі ішсін», –
деп жырлаған екен Мағжан ақын.
Қазақ десе қымыз атауы да қосарлана жүретін ұлттық сусын өндірісі бүгінде қай деңгейде? Талай тарихи жазбаларда, өлең-жырға арқау болып қазақпен бірге әлемге танылған қымыз жайы жаһандану заманында ұлттың брендіне айнала алды ма? Ұлттық сусынның қадір-қасиетіне немқұрайлы қарайтын бүгінгі буынның ішетін сусыны бөлек. Дүкендерде күн сайын тәтті сусындар мен энергетикалық сусын әрбір отбасының қалтасын қағып жатқаны жасырын емес. Тіпті бұл сусындарға сұраныстың артқаны сонша, «екінші нанға» айналды десек, артық айтқандық емес. Шыны керек, ұлттық сусынның қасиетін кешегі пандемия кезеңі сезіндірді. Дертіне шипа іздегеннің бәрі қымыз, шұбат іздеп сабылып кеткені рас. Статистикаға сүйенбей-ақ, өткен жылғы жағдайды сараптай келіп, қымыз, шұбатпен өзге түгіл өзімізді түгел қамтамасыз ете алмайтынымыз байқалды.
Қымыздың пайдасын түсініп, дәмін біліп алған көпшіліктің бүгінде ұлттық сусынға сұранысы артқандай. Енді дүкенге барса тәтті сусындармен бірге қымызды да ала кеткісі келіп тұрады. Ендігі мәселе – ұлттық сусындардың уақыт көшіне ілесе алмай, күбіде қалып қойғандығы. Күбідегі сусынның сапасына да, дәміне де еш күмән жоқ. Алайда уақыт талабына сай ағарғанды дүкенге күбісімен әкеле алмайтынымыз бесенеден белгілі. Біз күбідегі қымыздың дайындалуын айтып мақтанып жүргенде өзгелердің уақыт үніне жауап беріп, алдымызға түсіп кеткенін де байқамай да қалыппыз. «Facebook» әлеуметтік желісінен облыстық кәсіпкерлер палатасы директорының орынбасары Пірмұхаммед Сыздықовтың мына жазбасы ойға-ой қосты. Ол өзінің жазбасында ел экономикасында экспорт деңгейі төмендеп, керісінше импорт деңгейінің өскенін айта келіп, ел нарығын жаулап алған Ресейден бізге келіп жатқан бөтелкедегі қымыздың суретін қоса жариялапты. «Қазақстан жылқының, жылқы малының өнімдерін өндіретін бірден-бір Отаны бола отырып, көрші Ресейден келетін қымызға сұраныс артып отыр. Алып, ішіп көріңіз, бал татиды. Осыны өзімізден неге шығармасқа? Қымызды шыны құтыда өндірем деген инвесторлар болса, хабарласыңыздар, сүйемелдеуге әзірміз!» деп жазады. Көпшіліктің пікір алмасу алаңына айналған әлеуметтік желідегі жазылған пікірлерге зер салсақ, қалалықтардың көпшілігі дәл осы қымызды алады екен. Тіпті, дүкенге келген бойда сөреде көп тұрмайтынын, сұранысқа ие екенін де білдік. Жарты литрі – 700 теңге тұратын башқұрт қымызының құпиясы дәмімен қоса ыдысында екені сөзсіз. Әйтпесе, қымыз дайындаудың әдісін қазақтан артық білген кім бар? Бір айыбы – күбіде қалып қойғаны.
Күбідегі қымыз бөтелкеге құйылып, әлем нарығын қашан жаулар екен?
Жылдам ақпарат алу үшін Facebook, Instagram желілері мен Telegram каналымызға жазылыңыз!