Облыстық төтенше жағдайлар департаментінің «Жедел құтқару жасағы» оқу жаттығу базасында «Кроссфит» сайысы ұйымдастырылды. Аталған шараға құтқарушылардың отбасы мүшелері шақыртылып, құтқару қызметінің күн тәртібімен танысты.
Құтқару бөлімшелері арасындағы тартысты бәсекеде қатысушылар 10 мәрте белтемірге тартылып, жүк көлігінің доңғалағын 15 метр қашықтыққа енімен айналдырады. Ал 24 келілік гір тасын 10 мәрте көтеріп, ауыр бөренені 10 мәрте көтеріп отырып-тұруы қажет. Мұнан соң жүк көлігінің доңғалағын 10 метр қашықтыққа ауыр кувалмен ұрып жылжытқан соң, жерден қолды бүгіп жазу жаттығуын 20 мәрте жасады. Мұнан соң кезек келесі қатысушыға беріледі. Әрине, мұның барлығын бір мезетте жасау оңайға соқпасы анық.
– Кросфит жаттығулары – күш пен төзімділікке арналған заманауи спорт түрі. Ал құтқарушылар мұндай жаттығуларды күнделікті орындайды. Өйткені құтқарушылардың қызметі шыдамдылықты, физикалық дайындық пен қайсарлықты талап ететін іс-қимылдардан тұрады, – дейді ұйымдастырушылар.
Сайыс қорытындысымен №2 құтқару бөлімшесі І орынды қанжығасына байласа, №4 бөлімше ІІ орынды еншіледі. Ал №3 бөлімше үздік үштікті түйіндеп, ІІІ орынға табан тіреді. Сондай-ақ кроссфит сайысында ең үздік нәтиже көрсеткен С.Әлібеков пен 50 жастан асса да жастардан қалыс қалмай үздік нәтижесімен көш бастаған П.Нарынбетов те марапат мінберіне көтерілді.
Шара соңында құтқарушылардың балаларына авариялық-құтқару жұмыстары кезінде қолданылатын арнайы техникалар мен құрал-жабдықтар таныстырылды. Арнайы дайындалған көрме балалардың құтқару қызметіне қызығушылығын оятты.
Аян СПАНДИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!