Мемлекет пен қоғамның дамуын тежейтін, елдің ішкі бірлігіне сызат түсіретін ең қауіпті кеселдің бірі – сыбайлас жемқорлық.
Бүгінгі таңда бұл жай ғана заң бұзушылық емес, ұлттық құндылықтар мен әділдік заңдылықтарына төнген үлкен қатер, өйткені кез келген мемлекеттің қуаты оның экономикалық байлығымен ғана емес, ең алдымен, қоғамдағы әділдік деңгейімен және азаматтарының құқықтық санасымен өлшенеді. Дәл осы себепті әділ қоғам құру уақыт талабына айналып отыр, ал бұл індетпен тиімді күресу үшін тек жазалау шараларына иек артпай, адамдардың санасын түпкілікті өзгерту қажет. Ұзақ жылдар бойы жемқорлықпен күрес тек заң аясында айыппұл салу немесе бас бостандығынан айырумен шектеліп келгенімен, халықаралық тәжірибе көрсеткендей, тек жазаны қатайту арқылы бұл кеселді жою мүмкін емес, сондықтан басты мақсат — қоғамда жемқорлыққа қарсы «мүлдем төзбеушілік» мәдениетін қалыптастыру болуы тиіс.
Бұл ретте мемлекеттік қызметтердің электронды форматқа өтуі мен ақпараттық ашықтық парақорлықтың жолын кесуге үлкен септігін тигізгенімен, техникалық шаралардан бұрын адамның ішкі сүзгісі — ұят пен жауапкершілік сезімі оянғанда ғана нағыз адал қоғам орнайды. Адал қоғам дегеніміз — әрбір адам өз еңбегімен табыс табатын, заң алдында бәрі тең және мансап сатысымен өсу тек білім мен біліктілікке негізделетін орта болғандықтан, мұнда «таныс-тамырлық» пен «бармақ басты, көз қыстылыққа» ешқандай орын қалмайды. Егер мемлекеттік қызметші парадан бас тартса, мұғалім бағаны әділ қойса, ал дәрігер өз міндетін ақшасыз-ақ мінсіз атқарса, әр азаматтың өз жұмысына адалдығы бүкіл жүйенің тазаруына алып келеді, ал бұндай саналылық пен жемқорлыққа қарсы иммунитет, ең алдымен, отбасылық тәрбие мен мектеп қабырғасынан бастау алуы шарт.
Жас ұрпақтың бойына біреудің ақысын жемеу мен адал еңбектің қадірін сіңіруде бұқаралық ақпарат құралдары мен журналистердің де рөлі орасан зор, себебі олар жемқорлық фактілерін ашық көрсетіп, қоғамдық бақылауды күшейте отырып, әділдіктің шынайы үніне айнала алады. Қорыта айтқанда, сыбайлас жемқорлықты жеңу — тек құқық қорғау органдарының ғана жұмысы емес, бұл — бүкіл халық болып жұмылатын ортақ іс, сондықтан «Адал қоғам — ел болашағы» деген ұран әрқайсымыздың өмірлік ұстанымымызға айналуы тиіс. Тек әділдік салтанат құрған, заң үстемдік еткен және әр азамат өз елінің тағдырына жауапкершілікпен қараған мемлекет қана әлемдік аренада бәсекеге қабілетті болып, жарқын болашаққа нық қадам баса алатындықтан, әділ қоғамды құруды әрқайсымыз дәл бүгін өзімізден бастауымыз қажет.
К. Еримбетова,
“Туған жер” қоғамдық қозғалысы” қауымдастығы төрайымы
Жылдам ақпарат алу үшін Facebook, Instagram желілері мен Telegram каналымызға жазылыңыз!