«Мемлекет басшысы Қасым-Жомарт Тоқаев наурыз айының ортасында халыққа Жолдау жасайды, онда елді саяси трансформациялауға бағытталған асы маңызды шаралар айтылады» дегенді естігеннен көп үміт күткеніміз анық. Президент қандай өзгерістер жасайды? Саяси жүйе қалай өзгеруі мүмкін? Көптен күткен сұрақтың нық жауабы бүгін айтылды. Қызу талқыға түскен сауалдың жауабы көңіл көншітті ме?
Осы тұрғыда Жолдауда айтылған басты мәселелерге тоқталып өтсек. Президент Қасым-Жомарт Тоқаевтың тарихи құжатынан нақты жоспарды көрдік. Соның ішінде назар аудартатыны, саяси үстемдікке барынша шектеу қою қажет.
Қазақстанды қарқынды түрде қайта құрудың және жаңартудың негізгі қозғаушы күші ретінде партия жұмыс жасауы тиіс. Яғни әділетті түрде. Халық әкім немесе президент үшін партияны сайламайды. Партия арасында бәсекелестік артады. Барлық партиялар тең дамуы үшін тең жағдаймен қамтамасыз етіледі.
– Президент өзінің өкілеттігін атқару кезеңінде партияға мүшелігін тоқтата тұруға міндетті екенін заң жүзінде ресімдеуді ұсынамын. Бұл норма саяси бәсекені арттырып, барлық партияның дамуына бірдей жағдай жасайды. Осылайша, біз еліміздің болашақтағы көшбасшыларын негізгі саяси институттарды өзіне бағындырып алуға құмар болудан сақтаймыз, – деді Президент Қасым-Жомарт Тоқаев.
Сонымен қатар Президент заңға тиісті өзгеріс енгізе отырып, енді әкімдер мен олардың орынбасарлары партия филиалдарын басқаруды тоқтатуы керек деді. Әкімдерден тыс, алдағы уақытта Есеп комитетінің төрағасы, Орталық сайлау комиссиясының төрағасы сияқты өте маңызды қызмет атқаратын адамдар да партияға мүше болмайды.
– Расында, мұндай өзгерістер билік тармақтарының бірін-бірі тежеп, тепе-теңдікті сақтап отыруына, сол арқылы сайлаушылардың, азаматтық қоғамның оларға ықпал етуіне жол ашады. Әрбір партия тұтас мемлекетке, бүкіл халыққа қызмет етуі тиіс. Халық арасында сол кезде әрбір партияның қалай жұмыс жасайтыны анық аңғарылады. Жолдауда айтылғандай, әкімдер немесе орынбасарлары партия мүшесінен шығарылмайды. Олардың партиядағы қызметі тоқтатылады. Егер де лауазымдағы қызметтен босатылған уақытта қайтадан партиядағы жұмысын жалғастырып жасай алады. Бүгінгі тарихи құжаттан жаңа бастама көруге болады. Жаңару мен жаңғыру жолында Қазақстан биік белестерге жететіні анық. Бұл тұрғыда президент нақты іске көшкені байқалады. Жарқын болашаққа нық қадаммен жұмыс жасауға әрбіріміз үлес қосуға міндеттіміз. Президент бастамалары халық билік арасындағы сенімді арттырады, – дейді «AMANAT» партиясы Қызылорда қалалық филиалының атқарушы хатшысы Шәріп Әбдірахманов.
Президент Жолдауда жаңа саяси реформа ұсынды. Мемлекетімізді нығайтуда бір болып еңбек етуіміз қажет-ақ.
– Жаңа Қазақстанды қалыптастыру – баршамызға ортақ міндет Мемлекет басшысы Қасым-Жомарт Тоқаевтың жаңа Жолдауында елдің әлеуметтік-экономикалық дамуына, ұлттық құндылықтардың жаңғыруына ықпал ететін ауқымды бастамалар айтылды. Жолдаудағы тың бастамалар еліміздің саяси жүйесі мен әкімшілік-аумақтық құрылымын едәуір өзгертпек. Оны жүзеге асыру үшін Конституцияға 30-дан астам өзгеріс енгізіліп, жылдың соңына дейін тағы 20-дан астам заң қабылданбақ. Ел тұтастығын сақтау, әлеуметтік-экономикалық салалардың дамуына үлес қосу, жаңа Қазақстанды қалыптастыру – әрқайсысымыздың ортақ міндетіміз, – дейді Қорқыт ата атындағы Қызылорда университетінің әлеуметтік және тәрбие жұмыстары жөніндегі проректоры, іскерлік әкімшіліктендіру докторы Жандос Базартай.
Бүгінгі жолдаудың мән-маңызы айрықша. Алдыға биік мақсаттар қойылды. Жаңа Қазақстанды құруға бірге атсалысуға міндеттіміз. Өз өміріміз өз қолымызда екенін ұмытпайық. Әділетті, таза елде тұрғымыз келсе, сондай мемлекет құруға күш жұмсайық.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!