«SCAT Airlines» әуе компаниясы жүзеге асыратын Қазақстан мен Моңғолия астаналары арасындағы тікелей әуе рейсінің салтанатты ашылу рәсімі өтті, – деп хабарлайды KAZINFORM
Іс-шараға Қазақстанның Моңғолиядағы елшісі Алмас Сейтақынов, Моңғолия Үкіметі мен Ұлы Мемлекеттік Хуралының өкілдері, екі елдің авиациялық ведомстволарының қызметкерлері, «SCAT Airlines» және «Hunnu Air» компанияларының басшылығы, туристік агенттіктер, іскер топтар мен Моңғолияның бұқаралық ақпарат құралдарының өкілдері қатысты.
Өз сөзінде Қазақстан Елшісі Астана мен Ұлан-Батыр арасындағы тікелей әуе қатынасының ашылуы Қазақстан Республикасының Президенті Қасым-Жомарт Тоқаевтың 2024 жылы Моңғолияға және Моңғолия Президенті Ухнаагийн Хүрэлсүхтің биыл Қазақстанға жасаған мемлекеттік сапарлары шеңберінде қол жеткізген уағдаластықтардың маңызды практикалық нәтижесі екенін атап өтті.
2026 жылғы 2 маусымда іске қосылатын рейс екі ел арасындағы сауда-экономикалық, туристік, гуманитарлық және өңіраралық байланыстардың одан әрі дамуына, сондай-ақ Қазақстан мен Моңғолия арасындағы көлік байланысын нығайтуға ықпал ететіні аталып өтті.
Айта кетелік Моңғолияда алғаш рет «Study in Kazakhstan» халықаралық білім көрмесі өткен еді.
Жылдам ақпарат алу үшін Facebook, Instagram желілері мен Telegram каналымызға жазылыңыз!