Мәжіліс депутаттары Қазақстанның мемлекеттік наградалары туралы заңға өзгерістер енгізу туралы заң жобасын мақұлдады, – деп хабарлайды kursiv.media
Құжатқа сәйкес, енді елде үш жаңа орден пайда болады.
«Мейірім» ордені – меценаттық және қайырымдылық қызметпен айналысып, қайырымдылық саласына елеулі үлес қосқан азаматтарға табысталады.
«Қожа Ахмет Ясауи» ордені – танымал қазақстандық және шетелдік ғалымдарға, мемлекеттік және қоғам қайраткерлеріне беріледі.
«Әл-Фараби» ордені – білім мен ғылым, мәдениет және рухани өмір салаларында жетістікке жеткен азаматтарға арналған.
Заң жобасы Сенаттың қарауына жіберілді.
Еске салсақ, наурыз айында Президент Қасым-Жомарт Тоқаев «Қожа Ахмет Ясауи» орденін мемлекеттік наградалар тізіміне енгізу туралы жарлыққа қол қоятынын мәлімдеген. Ал сәуірде «Әл-Фараби» орденін тағайындауды ұсынды.
Президент «Мейірім», «Қожа Ахмет Ясауи», «Әл-Фараби» ордендері биыл алғаш рет Республика күні қарсаңында тапсырылатынын айтты.
Жылдам ақпарат алу үшін Facebook, Instagram желілері мен Telegram каналымызға жазылыңыз!