Қазақстандықтардың 73,7%-ы жеке табыстары мен шығыстарын белгілі бір деңгейде есепке алып отырады. Бұл туралы Қазақстандық қоғамдық даму институтының зерттеуінде айтылды, – деп хабарлайды KAZINFORM
Зерттеу нәтижесіне сәйкес, респонденттердің 34,9%-ы барлық қаржылық операцияларын жүйелі түрде тіркейді. Ал 38,8%-ы табысы мен шығысын шамамен есептеп отыратынын көрсеткен.
«Сауалнамаға қатысқандардың 73,7%-ы жеке қаржысын белгілі бір деңгейде бақылап отырады. Оның ішінде 34,9%-ы барлық қаржылық операцияларды тұрақты түрде тіркесе, 38,8%-ы шамамен есеп жүргізеді. Сонымен қатар респонденттердің 17,1%-ы шығыстарын мүлде бақыламайтынын айтса, 6,9%-ы мұндай есеп жүргізуді қажетсіз деп санайды», – делінген зерттеу қорытындысында.
Сарапшылардың айтуынша, қаржылық тәртіпке отбасы жағдайы да әсер етеді.
Атап айтқанда, кәмелетке толмаған балалары бар респонденттердің 78,7%-ы табысы мен шығысын тұрақты немесе ішінара есепке алады.
Ал балалары жоқ азаматтар арасында бұл көрсеткіш 70%-ды құраған.
Зерттеу авторларының пікірінше, жақындары алдындағы қаржылық жауапкершілік отбасылық бюджетті саналы түрде басқаруға ықпал ететін маңызды факторлардың бірі болып табылады.
Жылдам ақпарат алу үшін Facebook, Instagram желілері мен Telegram каналымызға жазылыңыз!