Қазақстанда Жеңістің 81 жылдығы қарсаңында фашизмді жеңуге өлшеусіз үлес қосқан азаматтарды бұрын-соңды болмаған материалдық қолдау дәстүрі жалғасуда. Биыл біржолғы төлемдерге шамамен 32,9 мың адамды қамту үшін (оның ішінде тыл еңбеккерлері, қаза тапқан майдангерлердің жесірлері, жарақат алу салдарынан мүгедектікке ұшыраған азаматтар және т.б.) 3,3 млрд теңгеден астам қаражат бөлінді.
Бүгінде Қазақстанда тұратын 57 Ұлы Отан соғысының ардагеріне ерекше көңіл бөлінді. Олардың әрқайсысына, тұрғылықты өңіріне қарамастан, 5 млн теңгеден төленді.
Ардагерлерге көрсетілетін материалдық қолдау деңгейі бойынша Қазақстан көшбасшы елдердің бірі саналады. Республикадағы төлем көлемі аймақтағы бірқатар мемлекеттердің көрсеткіштерінен едәуір жоғары. 2026 жылы майдангерлерге берілетін біржолғы көмек 5 млн теңгеге жетсе, Өзбекстанда бұл көрсеткіш 30 млн сумды (шамамен 1,1 млн теңге), ал Беларусь елінде 5 мың беларусь рублін (шамамен 715–825 мың теңге) құрады.
Ресей Федерациясында 10 мың рубль көлеміндегі федералдық төлемнен бөлек (шамамен 61 мың теңге), өңірлік үстемақылар қарастырылған. Мәселен, Мәскеу мен Мәскеу облысында 70 мың рубльге дейін (шамамен 430 мың теңге) төленеді. Алайда осы қосымша төлемдерді есепке алғанның өзінде, жалпы көмек көлемі Қазақстандағы көрсеткіштен бірнеше есе төмен.
Бұл жағдай қазақстандық ардагерлердің ерекше мәртебесін айқындап, оларды әлеуметтік қорғауға бағытталған мемлекеттік саясаттың жүйелі сипатын көрсетеді.
Қаржылай қолдаудан бөлек, мереке әрбір қаһарманға деген ерекше құрметпен және жеке көңіл бөлумен толықтырылады. Мемлекет басшысы бірнеше рет атап өткендей, еліміз майдан мен тылда ерлік көрсеткен азаматтардың батырлығы мен еңбегін әрдайым қастерлейді. Мемлекет жанқиярлық пен батылдықтың шынайы үлгісін танытқан қаһармандардың есімін құрметпен ұлықтайды.
Жылдам ақпарат алу үшін Facebook, Instagram желілері мен Telegram каналымызға жазылыңыз!