Еліміз 22 қарашадан бастап коронавирусқа қарсы ревакцинация жұмыстары басталды. Оған Қызылорда облысы да сақадай сай дайын. Бұл жөнінде өңірлік коммуникациялар қызметінде өткен бирфингте облыстық денсаулық сақтау басқармасы басшысының орынбасары Жангелді Шайымбетов мәлімдеді.
– Вакцина – бұл пандемиямен күрестегі шешуші қадам. Біз індетпен күресті тоқтатпауымыз керек. Жағдайды ушықтырмау сіз бен біздің қолымызда. Сондықтан ревакцинация салдырып, ұжымдық иммунитет қалыптастыруға асығайық. Бүгінде вакцина салу орындары талапқа сай жабдықталған. Әрбір емханада иммундау жүргізетін салқындату жабдықтары орналасқан жеке вакциналау кабинеттері бар. Онда білікті дәрігер, мейірбике-вакцинатор және мейірбике-тіркеуші сияқты мамандар жұмыс істейді. Сонымен қатар вакцина алғандар 30 минут дәрігердің бақылауында болады. Облыс бойынша КВИ-ға қарсы иммундау науқанына 106 екпе кабинеті, оның ішінде аудандарда 91 кабинет тартылды. Одан бөлек шалғайдағы аудандар мен ауылдарда, адамдар көп шоғырланатын жерлерде (ірі сауда ойын-сауық орталықтары, базарлар және басқалары) індетке қарсы вакциналау үшін оқытылған медициналық персоналмен жасақталған, – деді Жангелді Мырзагелдіұлы
Жалпы өңірдегі эпидемологиялық ахуалға тоқталар болсақ, індет басталғалы бері өңірімізде коронавирус инфекциясымен 19246 науқас тіркелді. Өткен тәулікте 6 жағдай анықталды. Ал емделіп шыққаны 97 процентті құрайды. Қазіргі кезде облыс бойынша инфекциялық стационарда – 153 науқас, реанимациялық төсек-орында 22 науқас ем қабылдап жатыр.
Өткен жылдан бері шетелдік және отандық ғалымдар бұл дертпен күресу үшін вакцина жасау жолында аянбай еңбек етті. Нәтижесі де жоқ емес. Естеріңізде болса, елімізде халықты вакциналау алғаш ақпан айында басталды. Бүгінге дейін облыста вакцинаның 1 компонентімен егілгендер саны – 396301, халықтың қамтылуы 87,6 процентті, екінші компонентпен – 334321 (73,9 процентті құрап отыр. Енді ревакцинациялау арқылы векторлық «Спутник V», «Pfizer» салдырғандар 9 айдан кейін инактивті «Sinopharm», «CoronaVac», «Hayat-Vax», «QazCovid-in» вакцинасын алады. Ал инактивті вакцина алғандар 6 айдан соң, векторлық вакцина салдырады.
Ревакцинация – ең алдымен медицина қызметкерлері, мұғалімдерге, ішкі істер органдары қызметкерлеріне, жабық мекемеде жұмыс істейтін әлеуметтік қызметкерлер мен еріктілерге өз келісімімен салынады.
Ақмарал ҚАДЫРХАНҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!