Оқушы кезінен бейнелеу өнеріне қызығып, табиғатына жақын екенін білген Замзия Жағыпарова – арманына қол жеткізген маман.
Бүгінде өзінің сүйікті мамандығы бойынша өнер мектебіндегі көркемсурет бөлімінде 2013 жылдан бастап жұмыс істеп келеді. Онда оқушыларға композиция, кескіндеме мен сурет бейнелеу өнері және тарихы мен мүсін пәндерінен сабақ береді. Бірақ өнер мектебіне оқушыларды оқыту да балалардың жас ерекшелігіне аса мән беретінін жеткізді. Ал жасы 10 нан асқан балалар болса, олардың сурет өнерін алып кетуге мүмкіндігі бар екенін айтты.
Кейіпкеріміз оқушыларын халықаралық, республикалық, облыстық және қалалық байқауларға қатыстырып, жүлделі орындарға ие болып жүргенін айтты.
– Оқушыларымның ішінде ерекше талантымен көзге түскен шәкірттерім бар. Олардың қатарында Медина Нұрлан 4-ші сынып оқушысы мен 2-ші сынып оқушысы Тоғжан Рабатова бар. Басқа шәкірттерім де осал емес. Бұл екеуі өздерінің жеке көрмесін жасады. Әр оқушы өзінің графика, пейзаж, натюрморт, композиция, портрет және тағы да басқа түрлі жанрдағы 40-тан астам суреттерін қойды, – дейді Замзия бізбен әңгімесінде.
Жас мұғалімнің білім берудегі басты мақсаты талантты шәкірт дайындап, еліміздің өсіп өркендеуіне үлес қосатын саналы ұрпақ тәрбиелеу екенін жеткізді.
Н.АЛТЫН
Жылдам ақпарат алу үшін Facebook, Instagram желілері мен Telegram каналымызға жазылыңыз!