Мәдениет министрі Сыр өңірінде

Кеше Қазақстан Республикасының Мәдениет және спорт министрі Ақтоты Райымқұлова Сыр өңіріне жұмыс сапарымен келді.

Мәдениет министрі Ә.Тәжібаев атындағы облыстық әмбебап ғылыми кітапханасында мәдениет және өнер өкілдерімен кездесті.

Шара алдымен әл-Фарабидің 1150 жылды­ғына арналған «әл-Фараби әлемі», Абай Құнанбайұлының 175 жылдығына орай «Кемеңгерліктің биік шыңы – Абай» және «Ел тұғыры тәуелсіздік» тақырыбында кітап көрмелерінен бастау алды. Сонымен қатар облысымызда мәдениет саласы бойынша «Жұмыспен қамту 2020-2021» жылдарға арналған жол картасы аясында жүзеге асырылып жатқан жобалармен таныстырылды.

Кездесу барысында Ақтоты Райымқұлова өңірде мәдениет саласы бойынша атқарылып жатқан жұ­мыстарға оң бағасын беріп, Президент Жолдауынан туындайтын негізгі мін­деттерге тоқталып, оның атқарылуы жайлы ойымен бөлісті.

– Биыл мәдениет саласы қызмет­керлерінің еңбекақысы көтерілді. Бұл – сіздер­дің еңбектеріңіздің еленгені.                                                                                                                                       

Сыр өңірі мәдениеті ежелден қалып^­тасқан тарихи тамыры терең тағылым. Оған дәстүрлі жыраулық өнер мен ақын­дық сипат өң береді. Бұл аймақ – өркениеті өскен ел, өнері өрістеген жер. Оның бір ғана дәлелі – ақын ұлдарыңыз Мұхтар Ниязовтың алтын домбыраны үш мәрте жеңіп алып, Сыр төріне тарту етуі. Мәдениет – елдің бет-бейнесі, ажары, абыройы. Өркениетті елдер ең алдымен тарихымен, мәдениетімен, ұлтын ұлықтаған ұлы тұлғаларымен мақтанады. Осындай халықтардың қатарына қазақ халқында жатқыза аламыз. Өйткені хал­қымыз дала өркениетінің ұйтқысы болған алып сахараның мәдениеті мен өнерінің өркендеуіне өз үлесін қосып келеді. Тәуелсіздігіміз тұғырлы, өнеріміз өрісті бола берсін, – деді ҚР мәдениет және спорт министрі Ақтоты Райымқұлова.

Кездесуде Қазақстанның Еңбек сіңір­ген қайраткері, «Құрмет» ордені ие­гері Н.Бекежанов атындағы қазақ акаде­миялық музыкалық драма театрының көркемдік жетекшісі Хұсейін Әмір-Темір  министрге өз қолтаңбасымен кітап тарту етті. ҚР Мәдениет саласының үздігі, ақын Серік Ыдырысов «Сыр елі – жыр елі» екендігін өлең шумақтарымен жеткізіп, жылы лебізін білдірді.

Кездесу қорытындысында бірқатар мәдениет саласының өкілдері ҚР Мәде­ниет саласының үздігі төсбелгісімен ма­рапатталды. Сонымен қатар басқа да өнер өкілдеріне ҚР мәдениет министрінің құрмет грамотасы мен облыс әкімінің алғыс хатын табыстады.

Тұрар БЕКМЫРЗАЕВ

Жаңалықтарды өз уақытында оқу үшін Telegram каналымызға жазылыңыз!