Осы күні қоғамдық көлік сапасына айтылар сын-пікірлер көп екені жасырын емес. Халық санының өсуі жыл сайын қоғамдық көлікке деген сұранысты арттыруда. Жаңа оқу жылының басталуына да санаулы күндер қалды. Бұл кезеңде білім беру ұйымдарымен қатар, қаладағы қоғамдық көлік қызметіне де түсетін жүктеме артады. Әсіресе таңертеңгі және кешкі уақытта автобустарға деген сұраныс жоғарылайды. Осыған байланысты қалада қоғамдық көліктің жаңа оқу жылына дайындығын пысықтау мақсатында қала әкімі Нұржан Ахатов қалалық автобус паркіне барып, жолаушылар тасымалының ұйымдастырылу барысымен танысты.
Қоғамдық көлік сапасына қойылатын негізгі талаптың бірі – тазалық. Осыған орай, қала әкімі әрбір автобустың ішкі және сыртқы тазалығын күнделікті бақылауда ұстауды тапсырды. Автобустар бағытқа шығар алдында жуылып, дезинфекцияланып, салондары талапқа сай ретке келтірілуі қажет. Бұл, әсіресе, күн сайын қоғамдық көлікті пайдаланатын оқушылар мен студенттер үшін маңызды. Қала әкімі Нұржан Ахатов әрбір автобустың ішкі және сыртқы тазалығы күнделікті бақылауда болуы тиіс екенін қадап айтты.
Рейске шығар алдында көліктерді жуу, дезинфекциялау және салондарды ретке келтіру жұмыстарын жүйелі түрде жүргізуді тапсырды. Жұмыс сапары барысында автобустардың техникалық және санитарлық жағдайы, қозғалыс интервалы, сондай-ақ жаңа оқу жылы қарсаңындағы тасымалды күшейту мәселелері қаралды.
Сонымен қатар қозғалыс кестесінің сақталуы тұрақты бақылауда болады. Әсіресе мектептер мен оқу орындары орналасқан аумақтардағы жолаушылар ағыны назарға алынып, автобустардың қозғалыс интервалы барынша қысқартылады. Бұл оқушылар мен студенттердің сабаққа уақытылы жетуіне мүмкіндік беріп, таңғы және кешкі уақыттардағы жолаушылар легін тиімді ұйымдастыруға бағытталған.
Қала әкімі жауапты сала басшыларына қоғамдық көлік қызметінің сапасын бақылауды күшейтіп, автобустардың кешігуіне және салондардың талапқа сай болмауына жол бермеуді тапсырды.
– Біздің басты міндетіміз – балаларымыздың мектепке қауіпсіз барып-келуін қамтамасыз ету. Автобустардың кешігуіне немесе салондардың таза болмауына жол берілмеуі тиіс, – деді Нұржан Ахатов.
Қазіргі таңда «Қызылорда автобус паркі» ЖШС-не қарасты үлкен сыйымдылықтағы автобустар қалалық бағыттар бойынша жолаушыларға қызмет көрсетуде. Қолданыстағы бағыттардағы қозғалыс интервалы орта есеппен 12-15 минутты құрайды. Автобустардың техникалық жағдайы күн сайын тексеріліп, ақауы анықталған көліктер рейске жіберілмейді. Оның орнына резервтік автобус шығарылады. Қалаішілік жолаушылар тасымалын қамтамасыз ету үшін күн сайын 260 автобус жолға шығады. Ал жаңа оқу жылының басталуымен қоғамдық көлікке түсетін жүктеме едәуір артады. Осыны ескере отырып, 25 тамыздан бастап қалаішілік автобус бағыттары күшейтілген режимде жұмыс істейді. Қала әкімі Нұржан Ахатов оқушылар мен студенттердің сабаққа кешікпей жетуі үшін көліктердің аралық интервалын барынша қысқартуды және қозғалыс кестесін қатаң сақтауды тапсырды.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!