Қала әкімі Асылбек Шәменов жергілікті БАҚ өкілдерімен бірге қала аумағындағы бірқатар нысанды аралады.
Балалар жылына орай облыс әкімі мен жеке кәсіпкерлердің қолдауымен қаламызда 50 спорт және балалар ойын алаңдары салынады. Алғашқы жұмыстар басталып кетті. Қазіргі таңда «Бәйтерек» тұрғын ауданы, «Баламекен» ауылында жалпы ауданы шамамен 560 шаршы метр болатын аумақты спорттық тренажерлар, балалар ойын және футбол алаңының құрылысы жүріп жатыр. Қала әкімі жұмыс барысымен танысып, Ең бастысы сапаға мән беру қажеттігін атап айтты.
«Бәйтерек» тұрғын ауданының балаларын қуантуды «Корпорация Әлем-құрылыс» ЖШС мекемесі міндетіне алған. Ойын алаңының сапалы, қауіпсіз болуы мекеме басшысы Русланбек Сейтмұратовқа міндеттелді. Жақын арада бітіруді емес, сапалы болуын қамтамасыз етуді назарға алу қажеттігі айтылды.
– Шет аймақтар шет қалмайды. Айта кетейік, биылғы жылға қаланың шет аймақтарына 3 ойын алаңы құрылысын салу үшін қалалық бюджеттен қаржы қаралып, мемлекеттік сатып алу конкурсы ұйымдастырылуда. Сондай-ақ демеуші мердігер мекемелердің қаражаты есебінен 50 ойын алаңын салу бастау алды. Ойын алаңдарының сапалы, қауіпсіз болуы – басты шарт, – деді қала әкімі.
Қазіргі уақытта «Бәйтерек» тұрғын ауданында – 1, Алшынбаев көшесінде – 1, Тәуелсіздікке 20 жыл көшесінде – 1 ойын алаңының құрылысы жүріп жатыр.
Бүгінде кезең-кезеңмен шеткі аймақтағы жолдар жөнделу үстінде. Жолды салып, көшелер тегістелгенмен артынша тағы бір мәселенің шеті шығады. Ол – жолдың сапасы. Расында, қалада жөнделген кейбір көшелердің бір жылға жарамай қайта бұзылып жатқанын көріп жүрміз. Тиісті қаражат бөлінген соң жұмысты сапалы жасауға міндетті. Себебі, бөлінген қаржының сұрауы бар екені белгілі.
Қала әкімі «Бәйтерек» тұрғын ауданындағы ұзындығы 4 шақырым болатын 1-ші кіреберіс және ұзындығы 5 шақырым болатын 2-ші кіре беріс жолға орташа жөндеу жұмысын көрді. Жеңімпаз атанған мердігер мекеме «Қызылорда жолдары» ЖШС. Мұнда арнайы техникалардың көмегімен көшенің үстіңгі қабатын тегістеуде. Жұмыс барысын көрген қала басшысы серіктестік басшысына жолды сапалы әрі мерзімінде орындауды тапсырды. Асфальт қабатының қалыңдығы тиісті талаптарға сәйкес болу қажеттігі айтылды. Осыған орай, қала әкімі жауапты мердігерге кемшілік болмауын қатаң ескертті.
Қаланы көркейту-көгалдандыру үшін алдымен су қажет екені белгілі. Сондай-ақ жеке тұрғын үйлер аяқ судың тапшылығын сезініп жатыр. Осы орайда қала әкімі осындай ауқымды мәселенің шешімін табуды тапсырған болатын. Қазіргі уақытта Қорқыт Ата көшесі мен Т.Тілеулиев көшелерінің қиылысында жер асты суы ұңғымасының құрылысы бастау алған. Шаһар басшысы аяқ су құрылысының жұмысын өзі барып көрді. Алдағы уақытта кемшіліктер туындамауы үшін нәтижелі жұмыс жасау керектігін айтып өтті. Бүгінде ұңғыма арқылы шыққан жер асты суы арықтарға жіберілуде. Мердігер мекеме «Бақ-Береке» ЖШС жүзеге асырып жатқан жобаның жалпы құны 14,7 млн теңгені құрайды.
Биыл республикалық бюджеттен қаржы қаралып 31 дана аяқ су ұңғыламаларын орнату жұмыстары жасалады. Оның 12 данасы қалаға, 19 данасы кент және ауылдық округтерге орнатылады. Кезекті жоба Арай-2 мөлтек ауданында да сәтті жүзеге асырылды. Жер астынан шыққан су аталған аумаққа жіберіліп, тұрғындар игілікті іске алғыстарын білдіруде.
Құрылыс жүріп жатқан жұмыстарды аралап көрген қала әкімі күннің ыстығына қарамай ортақ мүдде үшін еңбек етіп жүрген құрылысшыларға алғысын білдірді. Сондай-ақ сала басшыларына жүзеге асуы тиіс жобалардың нәтижелі болуын тапсырды. Мекеме басшыларына әрбір істен сапа мен жауапкершілікті талап ететінін айтты.
Қала тұрғындарының игілігі жолындағы тоқтаусыз тірліктерді көрген адамның көңілі марқая түсері анық. Тек осындай ауқымды атқарылған іске жауапкершілік таныту қажет екенін тұрғындар түсіне білген жөн. Мәселен, балалар үшін салынған ойын алаңдарын күтіп ұстауда жанашырлық танытқаны дұрыс. Сонымен қатар көшедегі арық бойын таза ұстап, аяқ суды игілікке пайдалану арқылы қаланың көркеюі үшін өз үлестерін қосса құба-құп.
Айтолқын БАТЫРБАЙҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!