Көпбалалы отбасына қандай көмек көрсетіледі?

Көпбалалы отбасы – бе­реке-бірліктің үйлескен жері. Адамзат тарихында есімі елге танылған тұлғалардың көпшілігі көпбалалы отба­сында дүниеге келген деген сөз жиі айтылады.

Жалпы көпбалалы отбасы­ларға мемлекет тарапынан қандай көмек көрсетіледі? Бұл сұраққа қалалық жұ­мыспен қамту, әлеуметтік бағдарламалар және АХАТ бөлімінің басшысы Кенжегүл Құрақбаева жауап берді.

– Қазіргі таңда қала бойынша көп балалы алтын алқа, күміс алқалы аналар саны 3447. Ал төрт және одан да көп балалы отбасы саны – 12660. Мемлекет та­ра­пынан республикалық бюд­жеттен көпбалалы ана­ларға ай сайын бала санына қарай жәрдемақы төленуде. Сонымен қатар тұрмысы төмен отбасыларға да мем­лекеттік атаулы әлеу­меттік көмек төлеуде. Биыл­дың алты айында 5581 отбасы­на көмек көрсетілген, – деді бөлім басшысы.

Мақаланы жазу барысында Перизат есімді көпбалалы анаға хабарласып, пікірін білдік.

– Мен көп балалы бол­ғаныма шүкір айтып, қуана­мын. Әрбір бала үлкен бақыт қой. Балаларым үй шаруасын өздері дөңгелетіп отыр. Бір-біріне  қарайласады, кө­мек­теседі. Олар ешқашан ешкімнен көмек күтпейді. Өте қуаныштымыз. Әрқайсысын бірдей жақсы көреміз. Әйел үшін бұдан артық бақыт жоқ. Осылардың рахатын көрсек деп жүрміз. Балаларымның әрқайсысы елдің өркендеуіне өз үлесін қосатынына сенім­дімін, – дейді алтын құрсақты ана Перизат Болатқызы.

Біз өз кезегінде ұлын  –ұяға, қызын – қияға қондыр­ған, бүгінде бүтін бір әулет­тің тірегіне айналған, немере­лердің қызығына тоймай жүрген Сәуле Сайдова есімді әжемен тілдескен едік.

– Жас отбасыларға «өмірге ұрпақ әкелсеңдерші» десең ба­сында баспана, өзін де жұмыс жоқтығын айтады. Олардың екі-үш баламен шек­телуі жай қорқыныш сезім ғана. Бірақ одан қорқудың қажеті жоқ, әр баланың өз несібесі бар. Көп бала бірін-бірі жетелеп, қарайласып өсе­ді. Бір төсекте құшақтасып өскен бала мейі­рімді болады, – дейді ол.

Р.S. Көпбалалы отбасы – қоғам байлығы. Ұрпақ жалғастығы қай ұлт үшін де маңызды. Көпбалалы үйдің балалары бауырмал келеді деген де ұғым бар. Бір-біріне қарайласып, көмектесіп жүрген жас шамасы жақын балаларды көріп сүйсінесің. Бұл ата-анасынан алған тәрбиенің жемісі болса керек. Баланы тәрбиелеп, болашағы жарқын азамат өсіріп шығару үлкен еңбекті талап етеді.

Тұрар БЕКМЫРЗАЕВ

Жылдам ақпарат алу үшін Facebook, Instagram желілері мен Telegram каналымызға жазылыңыз!