Мейлі, мейлі, екі ұлымды қақса да уақыт арқадан,
Нағыз ұлым біреу ғана, ана екеуі жарты адам!
Иә, бізді қайда апармақ мына заман ықпалы,
Ұлан-байтақ жерімізді жарты адамдар қаптады, –
деп тек шындықты ту еткен айбарлы ақын Мұхтар Шаханов тереңнен ой толғаған. Қазір қоғамда қол аяғы бүтін болғанмен, белсенділігі төмен көшке ілесе алмай рухани жағынан дами алмай жатқан адамдар қаншама. Тағы да Мұхтар ақынға жүгінсек
Есегінен ез жігіт құлағанда
Жұбатыңдар,
Аяңдар,
Өйткені оның,
Құм боп кетер жігері жылағанда.
Алуан тағдыр берілген бұл адамға,
Тұлпарынан ер жігіт құлағанда,
Жұбатпаңдар!
Ер адам от-жігерін
Намысына жаниды жылағанда, –
деген өлең жолындағы кейіпкердей жігерсіз жандар қаншама. Ал біздің бүгінгі кейіпкеріміз Қуаныш Нұржігітов тағдырдың қаншама сынағына ұшырап, мүгедектік қамытын киіп сәби кезінен өмірдің қиын өткелдерінен өтсе де мойымаған, жігері от, жаны жайсаң жан.
Шығармашылық үйіне арнайы келіп, қаламгерлермен сұхбат құрғысы келген жігерлі жасты біз де құшақ жая қарсы алып, әңгімелестік. Әдепкіде «сөзге қалай тартсам екен? Қанша дегенмен жан дүниесіне мұң қонақтаған жан екен» деген ойлар санамды сансыратқаны рас. Дегенмен қарсы алдымда мен күткеннен басқа, жанарында үміт оты жарқыраған, кеудесі күмбірлеген сезімге толы, тағдырына дән риза жан тұрды. Менің де шашыраған ойым бүтінделді. Себебі өмірдің керемет екенін мойындап, тағдыр талқысына төтеп беріп, жұдырықтай жүрегін кірлетпеген өмірге ғашық жанды көріп таңғалдым.
Шиелі ауданында дүниеге келіп, қалада өскен. Өзінің айтуынша, жеті айлығында өмір есігін ашып, өмірге сап-сау болып келген бала 40 күннен соң ДЦП дертіне шалдыққан. Әйтсе де бала қиял шарықтап, өз арманынан бас тартуға бойдағы қайраты дес бермеген. Ол «тағдыр салды, мен көндім» деп уайымға беріліп, салы суға кетіп, төрт қабырғаға қамалған емес. Ес жиып, ақыл тоқтатып өз-өзіне келгеннен бері асау толқынға қарсы жүзіп, өмір үшін, арманына жету жолында күресумен келеді.
–Журналист болу арманым еді. Қызылорда қоғамдық телеарнасына бардым. Журналистерімен дидарластым. «QYZYLORDA» телеарнасының журналистерімен жүздесудің реті болмай жүр. Алла қаласа ол арманым да орындалар. Мұнан бөлек, менің басты арманым – қоғамда мен секілді денсаулығында кінәраты барларды көпшілік ортаға бейімдеп, талантын ашсам деймін. Мүмкін олардың ішінде танымал суретшілер, шеберлер, спортқа жаны құмар жандар жүрген шығар. Соларды қоғамнан шеттетпей, жәрдем беру. Көпшілігінің төрт қабырғада қамалып отырғанына қамығамын. Мүмкін, олардың ерік-жігері төмен болар, тіпті ұялатын шығар. Соларға көмегімді тигізсем өзімді бақытты сезінер едім. Мен қоғамда белсенді болуды қалаймын. 2012 жылдан қоғамдық жұмыстарға араласып, мүгедектердің мәселесін шешуге атсалысып келемін. Өмірден ешқашан күдер үзген емеспін. Қоғамда өз орныңды қалыптастырғанда ғана сені көпшілік құрметтейді. Көбіне мәселені әлеуметтік желіде ашық айтамын. Астанадағы «ҚазМедиаға» барып телеарнаға сұхбат берсем деймін. Қазақта «бұлақ көрсең, көзін аш» деген керемет сөз бар. Мүгедектігі бар жандардың арасындағы өнерпаздарды үлкен сахнаға шығарып, өнерін көпшілік тамашаласа қандай керемет. Ақындардың өлеңдерін оқып, жаныма қуат пен күш-жігер аламын. Жыраулар үйіне барып, терме тыңдаймын. Рухани қазына, тәлім-тәрбиеге толы терме жан дүниеңді тазалайды, – дейді ол.
Қуаныштың айтысқа жаны құмар. Өзінің айтуынша, теледидарда айтыс болса, экранның ар жағындағылармен айтысып отырады екен. Алматыдан арнайы тапсырыспен жасатқан домбырасы бар. Домбыра шертуді де ешкімнің көмегінсіз, өзі үйренген.
Ол әлеуметтік желіде белсенді. Суреттерін жүктеп, өз ойын жазып отыруға дағдыланған.
– Біреуге тәуелді болып, бұғып отыруды жаным қаламайды. Адам болып өмірге келген соң өмірді өз жарығыңмен нұрландырып, артыңда жақсы ізің қалғанға не жетсін. Мен өмірге, табиғатқа, ондағы тіршілік иесі адамдарға ғашықпын, – дейді Қуаныш.
Өз-өзіне сенімді кейіппен нық сөйлейді. Тек өзі емес, өзімен тағдырлас жандарға жанашыр болып отырған Қуаныштың жігері жасымасын дейміз.
Гауһар АСҚАРҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!