Биыл оныншы мәрте өткізілген «Мерейлі отбасы» ұлттық байқауы мәресіне жетті. Елімізде қыркүйектің екіншісі жексенбісі – «Отбасы күні» мерекесі. Мереке қарсаңында елордада байқау жеңімпаздарын марапаттау шарасы өтті.
Мемлекет тірегі отбасы десек, әрбір отбасының бақытты, бақуатты өмір сүруі еліміздің әлеуетін арттырып, мықтылығын көрсетеді. «Мерейлі отбасы» байқауы еліміздегі отбасы құндылығын насихаттауға бағытталған. Ата-анасын ардақтап, қариясын құрметтей білетін, Отанның отбасынан басталатынын ұғына білген жұртымыз үшін байқаудың орны ерекше. Жыл сайын «Мерейлі отбасы» ұлттық байқауына қатысушы отбасылардың саны артып келеді. Өңірде «Мерейлі отбасы – 2023» ұлттық байқауына қатысуға 304 отбасы өтінім берген. Аудан, қала бойынша өткізілетін іріктеу кезеңінен 16 отбасы облыстық кезеңге жолдама алды. Осы отбасылардың арасынан байқау талабына сай келетін, қазылар алқасы үздік деп таныған әулетке ғана республикалық кезеңге жолдама беріледі.
Жалпы он жыл көлемінде ұйымдастырылған байқауға осы аралықта 20 мыңнан астам отбасы қатысқан екен. Оның 63 процентін ауыл тұрғындары құрайды. Ал биылғы байқауда еліміз бойынша 3 мыңнан астам отбасы бақ сынаған. Нәтижесінде әр өңірден үздік шыққан 20 отбасы республикалық кезеңге өткен.
Астана төрінде өткен «Мерейлі отбасы – 2023» ұлттық байқауына Мәдениет және ақпарат министрі Аида Балаева қатысып, байқау қатысушыларына Мемлекет басшысы Қасым-Жомарт Тоқаевтың құттықтауын жеткізді.
«Мерейлі отбасы – 2023» ұлттық байқауында Сыр елінің атынан қазалылық Смағұловтар отбасы қатысып, аймақ намысын қорғады. Ғасыр жасаған Қабақ қария 10 бала тәрбиелеп, одан 22 немере, 32 шөбере, 2 шөпшек сүйген. Ұлы Отан соғысы ардагерінің өнегелі өмірі көпке үлгі боларлықтай. Өзінен тараған балалары қоғамның әр саласында абыройлы еңбек етіп келеді. Отбасы берекесін бірінші орынға қоятын Смағұловтар әулеті республикалық кезеңде үздік танылып, «Мерейлі отбасы – 2023» ұлттық байқауының лауреаты атанды.
– Адам баласы отбасы арқылы өседі, өнеді. Отбасының өсіп-өнуі үшін ата-ананың балаға қамқорлығы, берген тәрбиесі маңызды. Отбасы – үлкен құндылық. Мұны балаларға кішкентай кезінен ұғындыру керек, – дейді байқау жеңімпазы атанған әулеттің бәйтерегі Қабақ Смағұлов.
Сұрапыл соғыста от пен оқтың арасында Отанын қорғаған майдангер әке балаларын еңбекке баулып, төзімділікке шыңдап, отбасы ұғымының құндылығын ұқтыра білді. Балалары ата-ана үмітін ақтап, өздері де өнегелі отбасыға айналған. Қазалы ауданының құрметті азаматы, майдангер Қабақ Смағұлов балаларының білімді болғанын, ғылым жолын қуғанын қалаған. Бүгінде әке арманы орындалып, ғылым жолында еңбек етіп жүрген балалары бар. Ал немересі мәнерлеп сырғанаудан Қазақстан чемпионы болса, өзге балалары «Смағұл» шаруа қожалығын ашып, ауыл шаруашылығын өркендетуге үлес қосуда.
– Әкеміз балаларының ғалым болғанын қалады. Себебі біздің білімді болғанымызға, тәрбиелі болғанымызға көп көңіл бөлетін. Жұмыстан тыс уақытта ылғи бірге сабақ оқып, есеп шығаратынбыз, – дейді ұлы Кемал Смағұлов.
Балаларын адамгершілікке баулып, оларға отбасы құндылығын жастайынан сіңіріп, ұрпақ тәрбиесінде ұлағатты ұлықтап, мейірім мен махаббатты, парасатталықты сезіндіре білген әулет осылайша тамырын тереңге жайып, бедел биігінен көрініп жүр.
А.ӘЛІМ
Жылдам ақпарат алу үшін Facebook, Instagram желілері мен Telegram каналымызға жазылыңыз!