«Ұстаздық еткен жaлықпac, үйретуден бaлaғa» – деп Aбaй aтaмыз aйтқaндaй, бүгінде осы ұлы жолда аянбай еңбек етіп, ұрпақ тәрбиесін бірінші кезекке қоятын асыл жандар өте көп. Сондай жандардың бірі де, бірегейі Тасбөгет кентінің тұрғыны, ұзақ жыл ұстаздық жолда еңбек етіп келе жатқан Н.Ергешбаев атындағы №172 орта мектебінің көркем еңбек пәнінің мұғалімі Болатбек Дүйсебаев есімін ерекше атап айтуға болады.
Осы уақытқа дейін оқушылар ықыласына бөленіп, өз бағасын алған ардақты ұстаз Болатбек Бөлегенұлы қаңтар айында зейнет демалысына шықты.
Саналы ғұмырын жас ұрпаққа білім беруге арнаған Болатбек Дүйсебаевтың еңбек жолы жас ұрпаққа үлгі.
Ол 1960 жылы 1 қаңтарда Тасбөгет кентінде дүниеге келген. Мектеп табалдырығын алғаш 1967 жылы аттап, №11 қазақ орта мектебін 1977 жылы ойдағыдай бітіріп шыққан. Мектептен кейін 1977-1978 жылдар аралығында Шымкент қаласындағы №38 КТУ-ді, киномеханик мамандығы бойынша бітіріп, Сырдария аудандық кино жүйесінде аға киномеханик қызметін атқарады.
1978 жылдың қазан айынан бастап отбасы жағдайына байланысты «Риссовхозстрой» тресіне қарасты УПП мекемесінде ағаш шебері болып жұмыс істейді. Ал 1979-1981 жылдары Белорусия жерінде әскер қатарында «ПУ» командирі қызметінде болған. Әскер қатарынан оралғаннан кейін жоғарыда аталған мекемеде бұрынғы мамандығы бойынша жұмысын жалғастырады.
1983 жылы Қызылорда Гидромелоративтік техникумына түсіп, техник-гидротехник мамандығын бітірді. 1984-1993 жылдары ПМК-66 мекемесінде ағаш шебері-балташы, 1993-1995 жылдары «Альянс» ЖШС ағаш шебері мамандығы бойынша жұмыс істейді. 1995 жылы Оқу өндірістік комбинатында, 1996 жылы «Атамекен» оқушылар үйі орталығында «Шебер қолдар» үйірмесінің жетекшісі болып қызмет атқарады.
2000 жылы Қорқыт ата атындағы ҚМУ-ға мемлекеттік грант бойынша «Кәсіби оқыту және еңбек» кафедрасына түсіп, 2005 жылы бітіреді. Осы жылдан бастап, мектепте көркем еңбек пәнінен сабақ береді. Оқушыларды қөлөнерге баулуда еңбегі зор. Ол мектептегі барлық қоғамдық жұмысқа белсене қатысты.
Шәкірт тәрбиелеу жолында өзінің күш-жігерін, терең білімін, бай тәжірибесін жұмсаған ол ұстаздық қызметті абыроймен атқарды. Осы жылдары ол ұйымдастырушылық, іскерлік қабілеттерімен танылды. Шәкірттері де түрлі жетістіктерге жетіп, ұстаз үмітін ақтады.
Мәселен, 2015 жылы 8 сынып оқушысы Руслан Әуелбек қалалық ішкі саясат бөлімі мен «Самұрық инновациялық идеяларды дамыту орталығының» алғыс хатымен марпатталған. Сондай-ақ қалалық қосымша білім беру оқу-әдістемелік орталығы ұйымдастырған «Менің арманымдағы үй» атты макеттер сайысында 7 «А» сынып оқушылары Мұхаметәлі Берістенбаев, Март Фархад үздіктер қатарынан көрінген. Ал 2019 жылы республикалық дәстүрлі интернет олимпиадасында 8 сынып оқушылары Медет Батырхан, Шәутен Ниязовтар І дәрежелі, Қайрат Мұхаммебетқали ІІ дәрежелі дипломмен марапатталған.
Болатбек Бөлегенұлының жары Милла Жаналиева аталған мектепте кітапхана меңгерушісі болып қызмет атқарады. Ол – өз жұмысының тәжірибелі маманы. Отбасында екеуі екі ұл, бір қыз және жеті немере тәрбиелеп отыр.
Жақсы ұстазға екі ғана нәрсе керек, оның бірі – терең білім болса, екіншісі – үлкен жүрек. Балаға деген шексіз махаббаттың иесі болған шебер ұстаз бүгінде зейнетке шығып, өз еңбегінің жемісін көріп отыр.
Ардагер ұстаз – құрметті де ардақты ұғым. Болатбек Бөлегенұлы осы жылдарда қасиетті ұғымға көлеңке түсірмей еңбек еткен мұғалім. Еңбегі сонысымен бағалы.
Жылдам ақпарат алу үшін Facebook, Instagram желілері мен Telegram каналымызға жазылыңыз!