Жастар – қоғамның қозғаушы күші, ал ғылым жолын таңдаған жастар ел болашағының берік іргетасы. Солардың бірі – ғылым жолын таңдап, ізденісін туған өңірдің өзекті мәселесімен ұштастырып жүрген Бекжан Ғалымжанұлы. Ол Қорқыт ата атындағы Қызылорда университетінің магистранты, «Физика-химиялық талдау әдістері» инженерлік бейіндегі зертханасының инженері.
Жас маманның қазіргі таңда атқарып жүрген жұмысы ғылым мен өндірісті, экология мен инновацияны ұштастырады. Ол университет зертханасында жүзеге асып жатқан бірнеше ғылыми жобаға қатысып, зерттеу жұмыстарын жүргізіп келеді. Ғылыми ізденістерінің негізгі бағыттарының бірі – күріш қауызын қайта өңдеу арқылы одан пайдалы әрі құнды материалдар алу.
Күріш – Сыр өңірінің басты дақылдарының бірі. Ал оны өңдеу барысында қалатын қауыздың қоршаған ортаға әсерін азайтып, қайта кәдеге жарату – бүгінде өзекті мәселелердің қатарында. Осы бағытта жас зерттеушілер күріш қауызынан белсендірілген көмір, таза кремний диоксиді, целлюлоза, биокөмір, терра-прета және күріш қауызының экстрактынан моноглицеридтер алу бойынша жұмыстар жүргізуде.
– Зертханамыздағы ғылыми жұмыстар профессор Нұрбол Аппазов және Нұрғали Ақылбековтің жетекшілігімен жүзеге асырылады. Ұжымымыздың ғылыми жарияланым белсенділігі де жоғары. Мен де осы бағыттағы жұмыстарға атсалысып, зерттеу нәтижелері бойынша Scopus базасына кіретін халықаралық ғылыми журналдарда және «Қазақстанның химия журналы» басылымында бірнеше мақала жарияладым, – дейді Бекжан.
Жас ғалымның ғылымға келу жолы да ізденіске толы. Мектеп бітірген соң әл-Фараби атындағы Қазақ ұлттық университетіне «Фармацевтикалық өндіріс технологиясы» мамандығына оқуға түседі. Университетті бітіргеннен кейін DOSFARM фармацевтикалық өндіріс орнына жұмысқа орналасып, алғашқы тәжірибе жинайды. Кейін жаңа бағытта дамуды мақсат етіп, Қорқыт ата атындағы Қызылорда университетінің магистратурасына түседі. Магистратурада оқып жүріп, ғылымға деген қызығушылығы артып, зерттеу жұмыстарымен тереңірек айналысады. Қазір осы жолды жалғастырып жүр.
Бекжан үшін ғылыми ізденістің маңызы тек зертхана қабырғасындағы тәжірибелермен шектелмейді. Оның пікірінше, ғылым нақты мәселелерді шешуге бағытталғанда ғана қоғамға пайдасын тигізеді.
– Қызылорда облысы – еліміздегі күріш шаруашылығы жақсы дамыған өңірлердің бірі. Сондықтан күріш өндірісінен қалатын қауызды жай ғана қалдық ретінде емес, пайдалы шикізат көзі ретінде қарастырудың маңызы зор. Күріш қауызының құрамында бағалы компоненттер бар және оны дұрыс өңдеу арқылы әртүрлі функционалды материалдар алуға болады. Біз үшін ғылыми нәтижемен қатар, зерттеудің болашақта нақты өндіріске пайдасын тигізуі де маңызды, – дейді жас зерттеуші.
Бекжанның алдағы жоспары да ауқымды. Ол ғылым саласында кәсіби тұрғыда дамып, халықаралық ғылыми жобаларға қатысуды, шетелдік зерттеушілермен тәжірибе алмасуды мақсат етеді.
– Ғылым бір адамның еңбегімен ғана жасалмайды. Сондықтан тобымызбен бірге үлкен нәтижеге жетіп, зерттеулерімізді халықаралық деңгейге шығарғымыз келеді. Болашақта қоғамға, экологияға және өндіріске нақты пайдасы тиетін, әлемді жақсы жаққа өзгертуге аз да болса үлес қосатын жобалардың бір бөлігі болғым келеді, – дейді ол.
Айтолқын БАТЫРБАЙҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!