Қаламызда білім сапасын көтеру мақсатында ауқымды жұмыстар атқарылуда. Бүгінгі уақыт үнемі ізденіс пен жаңашылдықты талап етеді. Осы мақсатта оқушылардың ғылыми жоба, шығармашылықпен айналысуына жағдай жасау – басты міндет.
Соның дәлелі ретінде әлемдік жаңашыл білім беру саласын дамыту бағытында қаламыздағы Т.Есетов атындағы №264 мектеп-лицейінде «Обсерватория» кабинеті ашылған еді. Нәтижесінде мектеп оқушылары аспан денелерін обсерватория құрылғысы арқылы көре алады.
Жобаның негізгі мақсаты – балалардың жаратылыстану-математикалық сауаттылығын арттыру, ғылыми бағытта астрономия бағыты бойынша зерттеу жұмыстарымен айналысу. Обсерваторияда балалар телескоп, процессор, спектроскоп, арнайы призма мен Vive pro 2 шлемі секілді құрал-жабдықтармен жұмыс істей алады. Ал киностудия арқылы сапалы бейнеконтент түсіруге арналған заманауи жабдықтар қойылып, балалардың шығармашылық жұмыстармен еркін айналысуына жағдай жасалды. Сондай-ақ «Bio Master» кабинеті арқылы оқушылар қолдан макет жасап, жергілікті өлкетану іліміне тереңдей түседі.
«Мектеп обсерваториясы» соңғы үлгідегі жаңа құрылғылармен толық қамтамасыз етілген. Жаңа кабинет 2021 жылы жұмысын бастағанмен, аз уақыт ішінде үздік нәтижелерге жетіп үлгерген.
– Оқушылар мүмкіндікті кеңінен пайдалануда. Яғни олардың ғылыми бағытқа деген қызығушылығы жоғары. Мәселен, осы уақытқа дейін Қорқыт ата атындағы Қызылорда университетінің оқытушысы, профессор Бақыт Қалиевпен бірлесіп, обсерваторияның барлық мүмкіндігін балалармен бөлісуге тырысып келеміз. Нәтижесінде 11 сынып оқушысы Мағжан Дүйсенбек республикалық «Дарын» ғылыми жобалар конкурсының облыстық кезеңі бойынша ІІІ орын алып, обсерваторияның мол мүмкіндігін көрсетті. Оқушымызға физика пәнінің мұғалімі Әлия Сәрсенбай жетекшілік етті. Одан бөлек «Ғылым әлемін ашамыз» атты ғарыштық зерттеулер бойынша халықаралық ғылыми конкурсының ІІ орын жүлдегері атанды. Оқушыларымыз қазан айында Ақтөбе қаласында өткен республикалық астрономиялық олимпиадаға қатысып, дипломмен марапатталды. Сондай-ақ «Ай фазаларын зерттеу» ғылыми жобасынан Аружан Сейдалы І орын, Аружан Бихожаева ІІ орын алып, республикалық олимпиадаға жолдама алды. Сонымен қатар «Білімді ұлт: терең білім, еңбекқорлық және отаншылдық қасиет» тақырыбында өткен ғылыми көрмеде үйірме оқушылары Қызылорда облыстық білім басқармасының алғыс хаттарымен марапатталды.Үйірме оқушылары Алматы қаласындағы «Бөбек» Ұлттық ғылыми-практикалық білім беру және сауықтыру орталығында «Ғарыштық робототехника» тақырыбында арнайы курстан өтіп, сертификатқа ие болды. «Ұлы өнертапқыштыққа 10 қадам» атты ғылыми жобалар конкурсының қалалық кезеңінде Мағжан Дүйсенбек «Косманология» бағыты бойынша жүлделі І орын алып, ғылым жолындағы қоржынын тағы да толықтырды, – дейді Т.Есетов атындағы №264 мектеп-лицей директорының бейінді оқыту ісі жөніндегі орынбасары Жанар Күзембаева.
Қазіргі таңда жұлдызды аспанға назар аударатын адамдар саны аз. Астрономия саласымен тек кәсіби ғалымдар айналысады деген пікір бар. Алайда мектеп оқушылары бұл салаға ден қойып, зерттеу жасауда алғырлық танытып келеді. Оқушылардың аспандағы қандай да бір құбылысты зерттеуге мүмкіндігі зор. Яғни обсерватория жаратылыстану ғылымына қызығатын оқушылардың терең білім алуына жол ашуда.
– Оқушылардың аспан денелерін немесе құбылыстарды ажыратып, анықтай алуы, тіпті түсіндіре білуі бастауыш мектеп жасынан бастап астрономияға деген қызығушылықты дамыту өте маңызды. Мектеп оқушылары тек оқу процесімен шектеліп қалмауы үшін жан-жақты даму мақсатында «Мектеп обсерваториясы» қарқынды жұмыс жасап жатқанын айта аламыз. Оқушылар үшін «Обсерватория» кабинеті – аспан әлеміне ашылған даңғыл жол, – дейді Жанар Күзембаева.
Жылдам ақпарат алу үшін Facebook, Instagram желілері мен Telegram каналымызға жазылыңыз!