Ұлы ойшыл, ақын, ағартушы Абай Құнанбайұлы мұрасын насихаттау, жас ұрпақтың рухани-адамгершілік құндылықтарын дамыту және әдебиетке деген қызығушылығын арттыру мақсатында дәстүрлі республикалық XXVII «Абай оқулары» шығармашылық конкурсы 21–24 маусым күндері ақынның туған жері – Семей қаласында өтті.
Еліміздің барлық өңірінен жиналған талантты оқушылар Абай шығармаларын жатқа оқу, ақын шәкірттерінің мұрасын дәріптеу, көркем сөз оқу және ғылыми-шығармашылық ізденістер бағытында өз білімдері мен өнерлерін ортаға салды.
Қызылорда облысының намысын қорғаған 6 оқушы байқаудың қорытынды кезеңінде жоғары дайындық деңгейін көрсетіп, жүлделі нәтижелерге қол жеткізді.
Байқау қорытындысы бойынша Қазалы ауданының №170 мектептің 10-сынып оқушысы Жеңісбек Гүлназ «Сөз өнеріндегі ұлы Абай бейнесі» номинациясында Алтын медаль мен бағалы сыйлық – ноутбукты иеленді.
Сонымен қатар, Жалағаш ауданының №232 орта мектебінің 9-сынып оқушысы Қашақбай Кәусар «Абайдың ақын шәкірттері» номинациясы бойынша Қола медальмен марапатталды.
Ал Жалағаш ауданының №122 орта мектебінің 10-сынып оқушысы Тұрлыбай Ұлжан және Шиелі ауданының №251 орта мектебінің 10-сынып оқушысы Нұралықызы Іңкәр байқауды табысты аяқтап, Алғыс хаттарға ие болды.
Жас дарындардың бұл жетістігі – олардың қажырлы еңбегі мен ұстаздарының жүйелі жұмысының нәтижесі. Жеңімпаздар мен жүлдегерлерді құттықтап, алдағы білім мен өнер бәйгелерінде толағай табыстар тілейміз!
Қызылорда облысы білім басқармасының баспасөз қызметі
Жылдам ақпарат алу үшін Facebook, Instagram желілері мен Telegram каналымызға жазылыңыз!