Осы жылдың 2-5 қаңтар аралығында «Жаңақорған» шипажайында шығармашыл ұстаздардың облыстық «Тәжірибе алаңы – 2022» өткізілді.
Облыстық тәжірибе алаңына Қызылорда қаласынан 9 мұғалім қатысты. Төрт күнге созылған білім бәсекесі мен мәдени-спорттық шараларда ұстаздарымыз оқ бойы озық екендерін көрсетті. Атап айтсақ, «Үздік тренинг – 2022» кәсіби байқауында №222 және №261 мектептердің математика пәні мұғалімдері Әлия Қожантова мен Ақтолқын Ахметова І орындарды иеленсе, озық идеялар аукционында №3 мектептің информатика пәнінің мұғалімі Әбу Асқар өзінің тың идеясымен ерекшеленіп, жеңімпаз болды.
Сондай-ақ спорттық шараларда, үстел теннисінен №261 мектептің дене шынықтыру пәнінің мұғалімі Қуаныш Оспанов ІІ орын, шахматтан Абай мектебінің математика пәнінің мұғалімі Нұрдос Ережепов ІІ орын, кіші футболдан ер мұғалімдерден құралған команда ІІІ орынды иеленді.
Шығармашыл ұстаздарымыз мәдени шаралардың да үздігі бола білді. Жайдарман командалық әзіл-қалжың сайысында ұстаздарымыз І орыннан көрінсе, қазақтың төл өнері айтыста №101 мектептің орыс тілі пәні мұғалімі, ақын Мөлдір Айтбай шиелілік ұстазына жол беріп, ІІ орынға ие болды.
«Жалпы білім беру ұйымдарындағы педагог қызметкерлердің кәсіби құзыреттілігін дамыту» тақырыбындағы ғылыми-практикалық конференцияда №198 орта мектептің математика-информатика пәнінің мұғалімі Айдана Жауғашарова баяндама оқып, конференцияға белсенді қатысты.
ӨРЛЕУ БАҰО тренерлері Ж.Жұбауова мен М.Смағұлованың өткізген шеберлік сыныбына қатысқан Абай мектебі директорының бейінді ісі жөніндегі орынбасары Бақберген Әбілқасым мен №198 мектептің математика-информатика пәндерінің мұғалімі Айдана Жауғашарова үздік жұмыстары үшін «Құрмет» грамоталармен марапатталды.
Шығармашыл ұстаздардың XIX ТӘЖІРИБЕ АЛАҢЫНДА қалалық білім бөлімі әдіскері Нұрқанат Амантаевтың жетекшілігімен қатысқан ұстаздарымыз осылайша жоғары нәтижеге қол жеткізді. Үздік әдістемелік жұмыстары үшін Нұрқанат Амантаев «Құрмет» грамотасын иеленсе, шараның жүргізушілік тізгінін ұстап, кәсіби шеберлігін көрсете білген білім бөлімінің әдіскері Бағлан Қалиев да тәжірибе алаңының «Құрмет» грамотасымен марапатталды.
Жыл сайын дәстүрлі өткізілетін тәжірибе алаңы талай ұстаздың шығармашылығын шыңдап, дамытуына жол ашты. Солардың бірі, биылғы шараның сарапшысы №261 мектеп директорының ғылыми-әдістемелік жөніндегі орынбасары, педагог-шебер Гүлнұр Алиасқарова да белсенді атқарған жұмыстары үшін «Құрмет» грамотасымен марапатталды.
Республика бойынша тек Қызылорда облысында өткізілетін бұл шараны «Өрлеу» БАҰО» АҚ филиалы Қызылорда облысы бойынша педагогикалық қызметкерлердің біліктілігін арттыру институты және Облыстық Білім және ғылым қызметкерлері кәсіподақ комитетінің ұйымдастырғанын айта кеткен жөн.
Жылдам ақпарат алу үшін Facebook, Instagram желілері мен Telegram каналымызға жазылыңыз!