Қызылша – бұл вирустық жұқпалы ауру, көбінесе балалар арасында кең таралғанымен, екпе алмаған ересектерге де қауіпті болуы мүмкін. Аурудың қоздырғышы – өте тез таралатын вирус, ол ауа арқылы жөтелгенде, түшкіргенде немесе науқас адаммен жақын байланыста болғанда жұғады.
Қызылшаның алғашқы белгілері тұмауға ұқсас болып келеді. Ауру басталған кезде адамның дене қызуы көтеріледі, мұрны бітеліп, жөтел пайда болады, көздері қызарып, жарыққа сезімтал болады. Бірнеше күннен кейін денеде қызыл бөртпелер шыға бастайды. Бұл бөртпелер алдымен бетте пайда болып, кейін бүкіл денеге таралады.
Қызылша тек жеңіл өтетін ауру емес. Ол асқынуларға әкелуі мүмкін. Мысалы, өкпенің қабынуы (пневмония), құлақтың қабынуы немесе сирек жағдайда мидың зақымдануы кездеседі. Әсіресе иммунитеті әлсіз адамдар үшін қызылша өте қауіпті.
Аурудың алдын алудың ең тиімді жолы – вакцинация. Қызылшаға қарсы екпе балаларға жоспарлы түрде салынады және ол ағзаны аурудан қорғауда өте маңызды рөл атқарады. Екпе алған адамдарда қызылшамен ауыру қаупі айтарлықтай төмендейді.
Қызылшаның алдын алу үшін жеке гигиенаны сақтау, науқас адамдармен байланысқа түспеу және уақытылы екпе алу қажет. Егер ауру белгілері байқалса, дереу дәрігерге қаралу маңызды.
Қорытындылай келе, қызылша – қауіпті жұқпалы аурулардың бірі. Бірақ оның алдын алуға болады. Денсаулыққа жауапкершілікпен қарап, екпе алу арқылы өзіңізді және жақындарыңызды қорғауға болады.
Айнұр Шамшиева Оразақызы
N3 қалалық емханасының бөлім меңгерушісі, жалпы тәжірибелі дәрігер
Жылдам ақпарат алу үшін Facebook, Instagram желілері мен Telegram каналымызға жазылыңыз!