«Қазақалтын» тау-кен металлургия комбинатының шотынан 1,5 миллиард теңге көлеміндегі қаржы ұрланған. Күдіктілер ұсталды, деп хабарлайды Stan.kz ақпарат агенттігі.
Ақмола облыстық полиция департаменті баспасөз қызметінің ақпараты бойынша, биылғы 23 ақпанда «Қазақалтын» тау-кен металлургия комбинаты» АҚ өкілдері компанияның шотынан 1 миллиард 533 миллион теңге ұрлау фактісі бойынша полицияға жүгінді.
Аталған қылмысты ашу үшін криминалдық полиция және тергеу бөлімшелерінің тәжірибелі қызметкерлерінен арнайы жедел-тергеу тобы құрылды.
ҚР ҚК-нің 189-бабының 4-бөлігі «аса ірі мөлшерде сеніп тапсырылған бөтен мүлікті иемдену немесе ысырап ету» бойынша сотқа дейінгі тергеу басталды. Оның санкциясы 7 жылдан 12 жылға дейін бас бостандығынан айыруды көздейді.
«Жедел-іздестіру шаралары барысында ағымдағы жылғы 26 ақпанда полиция қызметкерлері Нұр-Сұлтан қаласында екі күдіктіні ұстады. Оның бірі 37 жастағы қаржы бөлімінің қызметкері болса, екіншісі оның 38 жастағы азаматтық некедегі күйеуі. Күдіктілерге қатысты сот «күзетпен ұстау» түріндегі бұлтартпау шарасын санкциялады», – деді ведомстводан.
Тергеу органы тергеу шеңберінде залалды өтеуді қамтамасыз ету шараларын қабылдайды.
«Тергеу мүддесіне орай басқа ақпарат жарияланбайды», – деп толықтырды ведомстводан.
Еске салсақ, жақында «Қазақалтын» кенішінен 122 миллион теңгенің алтыны ұрланған болатын.
Жылдам ақпарат алу үшін Facebook, Instagram желілері мен Telegram каналымызға жазылыңыз!