Оқу-ағарту министрлігі 1 қыркүйекте мұғалімдерге гүл сыйлау мәселесіне қатысты түсініктеме берді. Ведомствоның мәлімдеуінше, ұстазға гүл сыйлау-сыйламау оқушы мен ата-ананың ерікті таңдауы болып қалуға тиіс, – деп хабарлайды Massaget.kz тілшісі.
Министрлік өкілдері гүл сыйлау – жақсы дәстүр екенін атап өтті. Алайда бұл міндетке, жарысқа немесе ата-аналарға артық шығын әкелетін жағдайға айналмауы керек.
«Мұғалімдерге 1 қыркүйекте гүл сыйлау – жақсы дәстүр. Бірақ ол міндетке немесе жарысқа айналмауы, артық шығынға себеп болмауы керек. Ең бастысы – гүл шоғының көлемі мен бағасы емес, баланың мұғалімге деген құрметі. Сондықтан гүл сыйлау әр бала мен оның ата-анасының ерікті таңдауы болып қалуға тиіс», – делінген Оқу-ағарту министрлігінің ресми хабарламасында.
Сондай-ақ мектептер гүл немесе сыйлық сатып алуға бастамашы болмауы керек. Бұған қоса, білім беру ұйымдары ақша жинауды ұйымдастырмауға және мұндай міндетті ата-аналарға жүктемеуге тиіс.
«Біздің мақсатымыз – жаңа оқу жылының алғашқы күнін артық сән-салтанатсыз, жылы атмосферада өткізу. Сонымен қатар оның тәрбиелік мәнін сақтап, балалардың бойына мұғалімге құрмет, қарапайымдылық пен мейірімділік қасиеттерін сіңіру», – деп хабарлады министрлік.
Жылдам ақпарат алу үшін Facebook, Instagram желілері мен Telegram каналымызға жазылыңыз!