ҚР Тәуелсіздігінің 30 жылдығына орай «Туған жерге тағзым» жобасы аясында Қазақстанның еңбек сіңірген қайраткері, филология ғылымдарының кандидаты, дәстүрлі әнші Ұлжан Байбосынова өзі білім алған Тасбөгет кентіндегі №11 мектеп-лицейінен домбыра сыныбын аштырып, арнайы шеберлер қолынан шыққан 20 домбыраны сыйға тартты. Сондай-ақ С.Майқанова атындағы мәдениет үйінің жанынан ашылған «Ғибрат» үйірмесіне де 10 домбыра сыйлады.
«Ұлтымыздың ұлы аспабы – домбыра» атты қазақтың қара домбырасының қасиетін ұлықтауға арналған шараға Тасбөгет кенті әкімі Семсер Сыздықов қатысып, жылы лебізін білдірді.
– Мұндай құнды мұра әр қазақтың үйінде тұруы тиіс. Ал мәдениет үйі мен білім ордаларында тұруы заңдылық деп ойлаймын. Ұлжан Мәлікайдарқызы Сыр өңіріне ғана емес күллі қазақ даласына есімі мәшһүр жырауларымыздың бірі. Ол көптеген халықаралық сахналарда Сыр сүлейлері шығармаларын насихаттап келеді. Ұлағатты өнер иесінің өз туған жерімен кездесу өткізіп, осындай баға жетпес асыл дүниені тарту етіп жатқаны бізге үлкен қолдау. Енді алдағы уақытта сіздің жолыңызды жалғап жыр көгінде қанат қағатын жас өнерпаздар шығады деп сенемін. Бұл ел тәуелсіздігінің мерейлі сәтінде бізге тамаша тарту болды. Еліміз аман, өнеріміз өміршең болсын, – деді кент әкімі.
Шара барысында Ұлжан Мәлікайдарқызы жас өнерпаздар өнерін тамашалап, өз шығармашылығынан да шеберлік сағатын өткізді. Фойеде «Тәуелсіздік – мәңгілік елдің тұғыры» тақырыбында кітап және қолөнер бұйымдарының көрмесі көрсетілді.
Ұлттық құндылықтарымыз ұлықталған шарада жергілікті тұрғындар рухани қуат алып, туған жеріне қамқорлық жасауды ұмытпаған Сыр перзентіне ризашылықтарын білдіріп жатты.
М.ЖӨКЕБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!