Бейсенбі, 07 мамыр, 06:02

  • Қаз
  • Qaz

Бізге жаңалық
жіберіңіз:

+7(702)932-52-25
Жаңа шығарылым
№33 (2245)
05.05.2026 PDF мұрағаты

Айдос Сұлтанғали – әлем чемпионы

23.09.2025

331 0

Қазақ спорты үшін тағы бір тарихи оқиға тіркелді. Қызылордалық балуан, грек-рим күресінің шебері Айдос Сұлтанғали Әлем чемпионатының алтын жүлдесін иеленіп, күллі елдің мерейін үстем етті.

Хорватия астанасы Загреб қаласында өткен дүбірлі додада 60 келі салмақ дәрежесінде бақ сынаған жер­лесіміз қарсыластарына дес бермей, финалдық белде­суде өзбек балуаны Алишер Ганиевті 9:0 есебімен ойсырата жеңіп, Әлем чемпионы болды.

Айдос Сұлтанғалидың бұл жеңісі тек Сыр елі үшін емес, қазақ спорты үшін тарихи оқиға. Себебі грек-рим күресінен еліміздің спортшылары әлем чемпионатының алтын жүлдесін соңғы рет осыдан 26 жыл бұрын иеленген болатын. 1998 жылы грек-рим күресінің даңқты өкілі Бахтияр Байсейітов ел қоржынына әлемдік додадағы ең жоғарғы жүлдені салған еді. Сол сәттен кейін талай мықты балуан финалға шығып, алтыннан дәмелі болғанымен, шешуші сәтте жеңіс бұйырмады. Міне, араға ширек ғасырдан астам уақыт салып, қазақ балуандарының арманын Айдос жүзеге асырды. Ол көк байрағымызды биікте желбіретіп, ел қоржынын алтынмен қанжығалады. Айдос Сұлтанғалидың чемпиондық жолы аса тартысты өтті. Алғашқы айналымда америкалық қарсыласын айқын басымдықпен ұтса, екінші белдесуде кореялық балуанды тізе бүктірді. Жартылай финалда грузиялық Амиран Чавадземен күресіп, өзінің мықтылығын дәлелдеді. Ақтық сында өзбек спортшысын айқын есеппен ұтып, жеңіс тұғырына көтерілді.

Айта кету керек, Айдос Сұлтанғали бұған дейін екі мәрте Әлем чемпионатының қола жүл­дегері атанған болатын. Енді міне, өзінің ең биік арманына қол жеткізіп, әлемнің үздігі атанды.Осы тарихи жеңістің маңызына тоқталған ай­мақ басшысы Нұрлыбек Нәлібаев чемпионды ар­найы құттықтап, оның жетістігі күллі қазақ спорты үшін үлкен мақтаныш екенін атап өтті.

– Бүгін – еліміздің, Сыр өңірінің спорт саласындағы тарихи күн! Жерлесіміз Айдос Сұлтанғали Әлем чем­пионы атанып, көк туы­мызды Хорватия­ның көгінде желбіретті. Айдостың бұл жеңісі барша халқымыздың мерейін үстем еткен тарихи оқиға, Сыр спортының абыройын асқақтатқан үлкен же­тістік. Құрметті сыр­бойылықтар, тарихи жеңіс баршаңызға құтты болсын! – деді облыс әкімі Нұрлыбек Нәлібаев.

Нұржан НҰҒЫМАДИЛЛА

 

 

Жылдам ақпарат алу үшін Facebook, Instagram желілері мен Telegram каналымызға жазылыңыз!

Тағы да оқыңыз: