Тілшінің тірлігі тек жедел ақпарат тарату емес, сонымен бірге дәлдік пен шыдамдылықты да талап етеді. Қалам мен микрофонды серік еткен шығармашылық ұжым бұл жолы спорттық алаңда бас қосып, сөз мергендері ғана емес, көз мергендері екенін дәлелдеді. Жасыл шұғаның үстіндегі тартыс, сырғанаған шарлардың сыңғыры мен мергендік сыналған сәт орын алды. Кәсіби мерекеге тарту ретінде қала әкімдігі ұйымдастырған бильярд турнирі түн уағына дейін жалғасты.
Қатысушыларға Қазақстанның құрметті журналисі, ардагер Жұматәлі Әбдіраман тілегін жеткізді. Салауатты өмір салтын насихаттау және әріптестік байланысты нығайтуды көздеген бұл дода «Альбион» бильярд залында өтті. Турнирдің ашылу салтанатында сөз алған қала әкімінің орынбасары Арнұр Нұрмағанбетов қаламгерлерге сәттілік тілеп, бұқаралық ақпарат құралдары мамандарының төл мерекесімен құттықтады.
– Мемлекет басшысы Қасым-Жомарт Тоқаев ақпарат саласы мамандарының қоғамдағы биік мәртебесін айқын белгілеп берді. Президентіміз атап өткендей, отандық масс-медиа – билік пен бұқара арасындағы алтын көпір, пәрменді әрі сындарлы байланыстың басты құралы. Расында, тәуелсіз еліміздің бүгінгі шежіресін жазып, жарқын болашағын қалыптастыруда, қоғамды демократияландыру жолында сіздердің атқарып жатқан еңбектеріңіздің маңызы зор. Сыр өңірінің тыныс-тіршілігін, жетістіктері мен дамуын халыққа шынайы жеткізіп жүрген қаламгер қауымына қала халқы мен өз атымнан шынайы ризашылығымды білдіремін. Төл мерекелеріңіз құтты болсын, – деді Арнұр Әлібекұлы.
Турнирде қаламын бильярд таяғы кийге алмастырған жергілікті бұқаралық ақпарат құралдары өкілдері мен мемлекеттік мекемелерден жиналған 25 қаламгер бақ сынады. Қатысушылар бильярдтағы шеберліктерін сынап, тартысты әрі қызықты ойын өрнегін көрсетті. Жоғары деңгейде өткен сайыста, ойыншылардың жеңіске деген ұмтылысы жарыстың көркін қыздырды. Кәсіби мерекеде ұйымдастырылған бильярд турнирі тартысты сәттерге толы болды. Жарыс қорытындысы бойынша «Қызылорда қоғамдық телеарнасының» аға монтажері Ержан Батыршаев жеңімпаз атанып, І орынды иеленсе. «Қазақстан» ұлттық арнасының меншікті тілшісі Әділбек Жахановқа ІІ орын бұйырды. Тұғырдың ІІІ орынын «Qyzylorda» телеарнасының өкілі Жангелді Әлібаев еншіледі. Жеңімпаздарға қала әкімінің алғыс хаттары мен қаржылай сыйы табысталды.
Сондай-ақ турнирде белсенділік танытқан бірқатар қатысушылар арнайы номинациялармен марапатталды. Атап айтқанда, «Сыр бойы» газетінің бөлім басшысы Дүйсенбек Аяшұлы, бас редактор Қуат Шарабидинов және «77 ТВ» телеарнасының операторы Бақытжан Бегімбай марапатталды.
Ерлер қауымы бильярд үстелінде мергендік байқатса, мерекеге орай қыздар арасында үстел теннисінен де қызу тартыс ұйымдастырылды.Кіші ракетка бәсекесінде бақ сынаған қаламгерлер спортқа деген қызығушылықтарын көрсетті. Жылдамдық пен жинақылықты талап ететін бұл сында нәзік жандылар тек қалам шебері ғана емес, спорт алаңында да белсенді әрі бәсекеге қабілетті екенін айқын аңғартты.
Жарыс қорытындысы бойынша «Ақмешіт жастары» газетінің тілшісі Аружан Оралбай I орын иеленіп көш басынан көрінсе, «Қызылорда қоғамдық телеарнасының редакторлары» Гүлнұр Ерниязова мен Шапағат Торғай II және III орындарды бөлісті. Ал «Сыр бойы» және «Сыр дидары» басылымдарының қатысушылары ынталандыру сыйлықтарымен марапатталды. Барлық жеңімпаздар мен жүлдегерлерге қала әкімінің марапаттары мен қаржылай сыйы табысталды. Осылайша, қос бірдей спорт түрінен өткен мерекелік дода Сыр журналистерінің бірлігі мен спорттық рухын тағы бір мәрте асқақтата түсті.
Думан КЕҢШЛІК
Жылдам ақпарат алу үшін Facebook, Instagram желілері мен Telegram каналымызға жазылыңыз!