Халықты баспанамен қамту ісі жыл сайын ілгерілеп келеді. Жақында облыс орталығында 240 пәтер пайдалануға берілді. Бұл жолы баспана әлеуметтік осал топқа жататын отбасыларға, оның ішінде көпбалалы аналар мен мүгедектігі бар жандарға берілді.
Жаңа пәтерлер Сырдария өзенінің сол жағалауынада бой көтерген. Мұнда бес қабатты 6 тұрғын үй ел игілігіне берілді. Тұрғындарға баспана кілтін табыстаған қала әкімі Нұржан Ахатов игілікті іс алдағы уақытта да жалғасын табатынын айтты.
– «Президент өз Жолдауында: «Елімізде бірыңғай тұрғын үй саясатын әзірлеу қажет. Негізгі қағидат – тұрғындар, әсіресе, әлеуметтік тұрғыдан әлсіз топтар үшін баспананың қолжетімділігін арттыру», – деген болатын. Мемлекет басшысының, Үкіметтің тұрақты қолдауының арқасында, облыс әкімінің үйлестіруімен бұл бағыттағы жобалар сәтті жүзеге асырылып келеді.
Бүгін міне, айтулы мереке қарсаңында 6 көпқабатты тұрғын үй кешенін пайдалануға берілді. 4 млрд 500 млн теңгеге салынған бұл кешеннің аумағы 15 600 шаршы метр. Құрылысты Сыр өңірінде талай жылдан бері қолтаңбасы қалған мердігер мекемелер салды, – деді қала әкімі.
Айта кетейік, биыл қала тұрғындарын баспанамен қамтуға бюджеттен 58 млрд теңгеге жуық қаржы бөлініп отыр. Бұл қаражатқа 31 көпқабатты үй салынады деген жоспар бар. Оның ішінде 945 пәтер ипотекалық, 1336 пәтер әлеуметтік осал топтарға арналған тұрғын үй болады. Оған қоса замануи дизайндағы жеті, тоғыз және он екі қабатты тұрғын үйлер бой көтеруде.
Пайдалануға берілген 6 тұрғын үйдің жалпы аумағы 15 мың шаршы метрді құрайды. Мұнда 240 отбасы қоныстануда. Тұрғын үй жанында қажетті инфрақұрылым әлеуметтік және білім беру нысандары орналасқан. Осындай мүмкіндікке пәтер иелері де риза.
– Көпбалалы ана ретінде тіркеліп, үй алдым. 14 жылдан бері күткен үйімнің кілтін қала әкімінің қолынан алып отырмын. Осы уақытқа дейін пәтер жалдап тұрған едім. Енді міне, 3 бөлмелі пәтер кілтін алып отырмын. Қуанышымда шек жоқ, жақын арада осында көшіп келемін, – дейді қала тұрғыны Самал Нұрмышева.
Жыл басынан бері 700-ге жуық қызылордалық баспаналы болғанын айта кетуіміз қажет. Ал жыл соңына дейін тағы 1581 пәтер пайдалануға беріледі деп жоспарланған.
Д.КЕҢШІЛІК
Жылдам ақпарат алу үшін Facebook, Instagram желілері мен Telegram каналымызға жазылыңыз!