«Белкөл» кентінің спорт кешенінде 300-ге жуық белкөлдік жастар спорттың 7 түрімен, атап айтқанда футбол, каратэ, бокс, джи-джитсу, еркін күрес, шахмат, үстел теннисімен машықтанып, халықаралық, республикалық, облыстық дәрежедегі жарыстың биік тұғырынан көрініп келеді.
Бұл туралы Белкөл кенті әкімі Жасұлан Сәду брифингте баяндады.
Кент әкімінің айтуынша, жыл сайын жастар арасында кіші футболдан «Каратэ-До»-дан Қазақстан чемпионы, қара белбеу иегері Сәпи Ернұрды және еңбегі сіңген теміржолшы Алмат Айдарбекұлын еске алуға арналған турнирді өткізу дәстүрге айналған. Жарысқа кенттің 1986-2007 жылғы жастары қатысып, бақ сынайды. Айта кетерлігі, жүлде қоры 500000 теңгені құрайды. Балалардың спортқа қызығушылығын арттыруда, белсенділігін көтеруге ықпал ететін турнирге балалардың ынтасы ерекше. Кентте бұқаралық спортты дамыту мақсатында жеке кәсіпкер өз қаржысына 1 футбол алаңын салса, 2020-2021 жылдары 2 спорттық жаттығу және Бірқазан елді мекенінде 2020 жылы 1 футбол алаңы салынған. Көпқабатты тұрғын үй аулаларындағы 8 ойын алаңы белкөлдіктердің салауатты өмір салтымен өмір сүруін, спортқа деген ынтасын оятып, белсенділікке шақырады.
Белкөлде кәсіптің көзін тапқандардың қатары көбейіп келеді. Мәселен, мұнда 464 шағын кәсіпкерлік нысан белсенді жұмыс көзіне айналып отыр. Олардың қатарында 42 жауапкершілігі шектеулі серіктестік, 399 дара кәсіпкер, 21 шаруа қожалығы бар.
6 айдың қорытындысымен 79 кәсіпкерлік тіркеліп, 79 тұрақты жұмыс орны ашылған. «Байқоңыр ӘКК» АҚ арқылы «Ауыл аманаты» бағдарламасы аясында жалпы құны 36,1 млн теңгені құрайтын 4 жоба қаржыландырылған.
– Кенттегі №1, 11, 12, 12А көпқабатты үйлерге қалалық тұрғын үй-коммуналдық шаруашылығы, жолаушылар көлігі және автомобиль жолдары коммуналдық мемлекеттік мекемесі арқылы 150 млн теңгеге ыстық су жеткізу жұмысы жүргізілуде. 15 млн теңгеге «Тағзым» алаңы жаңадан салынып, абаттандыру жұмысы жүргізілді. С.Ыбырайұлы көшесіне 9 млн теңгеге балалар ойын алаңы салынды. Сарыарқа, М.Есмаханов, Т.Абуов, Зеленая көшелеріне 94 млн теңгеге жарық бағаналары орнатылды. Жылу орталығы күрделі жөндеуден өткізіліп, мазуттан сұйытылған газ отынына ауыстырылды. Көпқабатты үйлер, әлеуметтік нысандар орталықтандырылған жылуға қосылып, толықтай ауызсумен қамтамасыз етілді. 2012 жылы «Ақбұлақ» бағдарламасы арқылы ауызсу жүйесі жаңартылды. «Таза Қазақстан» республикалық акциясы аясында кентте санитарлық тазалық, көркейту-көгалдандыру, тұрмыстық қатты қалдықтан тазарту жұмысы тұрақты жүргізілуде, – дейді кент әкімі.
Гауһар ҚОЖАХМЕТОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!