Кейінгі 3 жылда елімізде 104 бала көпқабатты үйдің терезесінен құлап көз жұмса, 600-ге жуығы түрлі жарақат алған. Ал жыл басынан бері облыс көлемінде ата-анасының қарауынсыз қалған балалардың терезеден құлап кетуіне байланысты 8 оқиға тіркелген. Бұл дабыл қағарлықтай жағдай. Әсіресе, осы мезгілде бұл трагедия көбейе түседі. Көпқабатты үйдегі балалар үлкендер көзін ала бере терезеге қарап ұмтылады. Мұның арты немен аяқталатынын жоғарыдағы сандарға қарап байқаңыз. Көп жағдайда терезеден құлау – ата-ананың қарауынсыз қалған 2-7 жас арасындағы балалар арасында болады. Қайғылы оқиғалардың басты себептерінің бірі – балалардың терезе торына сүйенуі. Бұл торлар баланың салмағын ұстап тұра алмай, қайғылы жағдайлар орын алуда. Жыл сайын қайталатын жағдайдың алдын-алуға болады, әрине. Ол үшін ата-ананың жауапкершілігі маңызды. Төтенше жағдайлар минстрлігі бұл жайтқа байланысты дабыл қағып, түсіндіру жұмыстарын күшейтті. Осы мақсатта қала әкімдігінде өткен брифингте қалалық Төтенше жағдайлар басқармасының бас маманы, азаматтық қорғау аға лейтенанты Совет Жасұлан қаладағы жүргізіліп жатқан түсіндіру іс-шаралары туралы кеңінен айтып өтті.
– Қалалық Төтенше жағдайлар басқармасы тарапынан қала әкімдігімен, қалалық полиция басқармасымен және еріктілер ұйымдарымен бірлесіп, балалардың көпқабатты тұрғын үйлердің терезелерінен құлау фактілерінің алдын алу мақсатында тұрғын үйлердің аулаларында тұрақты түрде түсіндіру және үгіт-насихат жұмыстары жүргізілуде. Аталған бағыттағы профилактикалық іс-шаралар аясында бұқаралық ақпарат құралдарында және әлеуметтік желілерде ақпараттық материалдар жарияланып, пайдалы бейнероликтер таратылуда. Сондай-ақ көрермендердің назарын қауіпсіздік мәселелеріне аудару мақсатында «Арай City Mall» ойын-сауық кешенінің кинотеатр залдарында арнайы профилактикалық бейнероликтер көрсетілуде. Бұдан бөлек, қаланың LED экрандарында және Президент саябағындағы айналмалы шолу дөңгелегінің электрондық экранында балалар қауіпсіздігіне қатысты пайдалы ақпараттар мен ескерту материалдары тұрақты түрде жариялануда, – деді Совет Жарқынұлы.
Сонымен қатар балалардың терезеден құлау оқиғаларын азайту үшін тұрғын үйлерге арнайы қорғаныс құрылғыларын орнату жұмыстары қолға алынған. Сондай-ақ қала әкімдігінің демеушілігімен көпқабатты тұрғын үйлерде тұратын көпбалалы отбасыларға арналған 127 дана терезе қорғағыш құрылғысы сатып алынуда. Бұл құрылғылар мұқтаж отбасыларға берілетін болады.
– Мұндай құрылғылар балалардың терезені өздігінен ашуына мүмкіндік бермейді және қауіптің алдын алуға көмектеседі. Қайғылы жағдайлардың басым бөлігі ересектердің салғырттығынан орын алады. Сондықтан ата-аналар мен қамқоршылар балалардың қауіпсіздігіне ерекше көңіл бөлуі қажет, – деді Совет Жасұлан.
Төтенше жағдайлар басқармасы тұрғындарға бірқатар маңызды қауіпсіздік шарасын сақтауды ескертеді. Атап айтқанда, үйде бала болған кезде терезелерді ашық қалдырмау маңызды. Әсіресе, терезедегі москит торын сенімді қорғаныс құралы ретінде пайдаланбау, балаларды терезе, балкон және шыны есіктердің жанында қараусыз қалдырмау қажет. Сондай-ақ жиһаздарды терезе маңына қоймау, балаларға қауіпсіздік ережелерін үнемі түсіндіріп отыру және терезелерге арнайы блокираторлар немесе құлыптар орнату ұсынылады.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!