Қаламгер Кенжалы Райымбекұлының өнегелі өмір жолы көпке үлгі. Жетікөлдің киелі топырағынан түлеп ұшқан шығармашылық өкілі қаламын жанына серік етіп, сыр мен сезімге толы жыр шумақтарымен елдің ықыласына бөленген жан. Мерейтой иесі 40 жылға жуық журналистика саласында еңбек етіп, ақпарат саласының өркендеуіне елеулі үлес қосты. Өлең өлкесінде өзіндік орны бар шығармашылық кеш иесінің азаматтық, тұлғалық бейнесін елге таныту мақсатындағы іс-шара аясында «Жырымен елін тербеткен» атты облыстық ақындар мүшәйрасы өтті.
Мүшәйраның мақсаты – ел руханиятына үлес қосқан ақын Кенжалы Ерімбетовтің өнегелі өмір жолы мен шығармашылығын кеңінен насихаттау, ақындық өнерді дәріптеу, жас таланттарға қолдау көрсету және өскелең ұрпақты туған жерге деген сүйіспеншілікке, елжандылыққа тәрбиелеу.
Мүшәйраға Қызылорда қаласы мен облыстың бірқатар аудандарынан келген талапкер ақындар қатысып, екі кезең бойынша бақ сынады. Бірінші кезеңде қатысушылар мерейтой иесіне арналған арнау өлеңдерін оқыса, екінші кезеңде еркін тақырыптағы авторлық шығармаларын оқыды.
Байқау барысында мерейтой иесіне ақжарма тілектер айтылып, құрмет көрсетілді. Ақынның сөзіне жазылған әндер орындалып, әдеби-музыкалық композициялар ұсынылды. Өнерпаздар ән мен жырдан шашу шашып, кештің мазмұнын айшықтай түсті.
Қазылар алқасының шешімімен жүлделі І орынды ақын Ақжол Түменбай, ІІ орынды Арал ауданынан келген Айдар Сайлауов еншілесе, ІІІ орынға шиелілік Бекжан Ержігіт пен жалағаштық Сәния Жақып лайық деп танылды.
Сондай-ақ Қанат Көзейбай, Ақтөре Ибрагимұлы, Бексұлтан Санақұл, Тұрар Бекмырзаев және Ізбасар Әбдібеков белсенді қатысқаны үшін Алғыс хатпен марапатталды. Байқау жеңімпаздары мен жүлдегерлеріне диплом мен бағалы сыйлық табысталды.
Гауһар ҚОЖАХМЕТОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!