Жетісу облысында екі бірдей баласын сатып жіберген әйел ұсталды. Тасбауыр ана әр сәбиін бір миллион теңгеге бағалап, қаржыны қалтасына басып үлгерген, – деп хабарлайды Massaget.kz .
Ішкі істер министрлігінің мәліметінше, 23 жастағы әйел былтыр қазанда босанып, шақалақты бірден ақшаға айырбастаған. Ол бауыр еті баласын делдал арқылы саудаға салған. Әйел өткен айда туған екінші сәбиін де бір миллион теңгеге сатып жіберген. Қазір қылмыстық іс қозғалып, соталды тергеу жүріп жатыр. Егер әйелдің кінәсі дәлелденсе, 9 жылға дейін бас бостандығынан айрылуы мүмкін.
«Күдікті делдалдар арқылы өзінің 2022 және 2023 жылы туған екі баласын сатқаны анықталды. Бірінші дерек 2022 жылғы қазанда, екінші дерек 2023 жылғы тамызда болған. Екі жағдайда да мәміле сомасы 1 миллион теңге болған», – деді ҚР ІІМ ресми өкілі Шұғыла Тұрлыбек.
Жылдам ақпарат алу үшін Facebook, Instagram желілері мен Telegram каналымызға жазылыңыз!