Маусымның үшінші жексенбісі жазуын өзінен өзге ешкім түсінбейтін медицина қызметкерлерінің төл мерекесі. Адам жанының арашасы – дәрігерлер қауымы қандай құрметке де лайық.
Осыған орай Н.Бекежанов атындағы музыкалық академиялық драма театрында медицина қызметкерлері күніне арналған «Еңбегіміз туған ел, саған!» атты мерекелік кеш өтті. Салтанатты шарада облыс әкімі Нұрлыбек Нәлібаев ақ халатты абзал жандарды құттықтап, салада атқарылған бірқатар жұмыстарға тоқталды.
– Әлемде қанша мамандық болса, олардың әрқайсысының адамзат үшін өз маңызы бар. Десе де кез келген сәтте адам өміріне араша болатын ақ халатты абзал жандардың орны ерекше. Дәрігер мамандығын таңдауға үлкен жүрек керек. Сонан соң сүйіспеншілігің мен өзіңе деген сенімің болуы қажет. Өйткені өлім мен өмір арасындағы жанталастың жауабын нағыз дәрігер ғана дөп басады. Адам денсаулығын сақтау мен нығайту, сырқатты емдеу мен аурудың алдын алу жауапкершілігін кездейсоқ адам атқара алмайды. Рас, ұлт денсаулығын нығайту – мемлекеттің маңызды міндеттерінің бірі әрі басты бағыты. Соның арқасында өмір сүру ұзақтығының артуына, ана мен бала өлімінің төмендеуіне ықпал етті. Мемлекет басшысы Қасым-Жомарт Кемелұлы Тоқаев дәстүрлі Жолдауында денсаулық сақтау саласының тиімділігін арттыру үшін медицина саласына қомақты қаржы құюды, бұл қаражаттың инфрақұрылымға, маман даярлауға және халықты дәрі-дәрмекпен қамтамасыз етуге жұмсалуға тиістігін айрықша атап өтті. Бұл тұрғыда аймақта бірқатар ауқымды жұмыстар атқарылуда, – деді аймақ басшысы.
Мерекелік шарада үздік қызметкерлер облыс әкімінің «Алғыс хатымен» марапатталды. Сондай-ақ сала ардагерлеріне «Еңбек ардагері» медалі табысталды. Бірқатар дәрігерге «Денсаулық сақтау ісінің үздігі», «Денсаулық сақтау ісіне қосқан үлесі үшін» төсбелгісі берілді. Сонымен қатар «Медицина үздіктеріне» 10 номинация бойынша облыс әкімінің арнайы 500 мың теңгелік сертификаты табысталды. Атап айтсақ, облыстық психикалық денсаулық орталығының білікті дәрігері Нұрлан Нұрпейісов ҚР «Денсаулық сақтау ісінің үздігі» төс белгісімен наградталды.
Нұрлан Базарбайұлы 25 жылға жуық тәжірибесі бар дәрігер. Білімді маман бүгінде орталыққа қарасты диспансер меңгерушісі болып абыройлы еңбек етіп келеді. Ол жұмысына өте тиянақты, жауапкершілігі зор, біліктілігі жоғары дәрігер. Нұрлан Нұрпейісов білгір клиницист, бірінші дәрежелі дәрігер-психиатр. Диспансер меңгерушісі жас мамандарға көп қолдау көрсетеді. Жинақтаған тәжірибесімен бөлісіп, ең бірінші кезекте науқастың дертінен сауығып кетуіне атсалысады.
Сонымен қатар айтулы шарада облыстық психикалық денсаулық орталығының бөлім меңгерушісі Маржан Естаева да марапат төрінен көрінді. Білікті дәрігер-наркологқа ҚР «Денсаулық сақтау ісіне қосқан үлесі үшін» төс белгісі табысталды. Маржан Естаева – өз ісінің нағыз маманы. Ол Ақтөбе мемлекеттік медициналық институтының түлегі. Алғаш еңбек жолын облыстық жұқпалы аурулар ауруханасынан бастаған. 2002 жылдан бастап облыстық психикалық денсаулық орталығында еңбек етіп келеді. Дәрігердің басты мақсаты – қауіпті кеселге шалдыққан жандарды сауықтырып, жақсы өмірге оралуына септігін тигізу. Жасыратыны жоқ, бүгінде Маржан Естаева жұмысы өте күрделі, науқастары қауіпті бөлімді басқарып отыр. Отыз жылға жуық тәжірибесі бар дәрігер маскүнемдік пен нашақорлыққа шалдыққан науқастарды нәтижелі емдеп келеді. Ақ халатты абзал жан бұл дертті жеңу үшін ең алдымен ем алушының қажыр-қайраты мен ерік-жігері керек екенін айтады.
– Негізінен біздің бөлімде соттың шешімімен емделу тағайындалған азаматтар жатады. Мұндай науқастармен жұмыс істеу өте қиын. Олардың басым бөлігі сырқаттарынан ем алуға ниетті емес. Тіпті өздерін «сау адам» санайды. Медициналық қызметкерлерге дөрекілік танытып, ем-дом жасауға қарсылық білдіреді. Соған қарамастан, біз қолымыздан келгенше ем шараларын жүргіземіз. Басты мақсатымыз – науқастарды дертінен айықтырып, жаңа өмір бастауына септігімізді тигізу, – дейді білікті дәрігер.
Салтанатты кеш концерттік бағдарламаға ұласты. Бір ерекшелігі, дәрігерлер ақ халаттарын сахналық киімге, медициналық құрал-жабдықтарын микрофонға айырбастап, әріптестеріне деген жүрекжарды тілегін әнмен жеткізді. Белгілі әнші-композитор, Қазақстанның еңбек сіңірген қайраткері Елена Әбдіқалықова медицина қызметкерлерін төл мерекемен құттықтап, Сыр төрін әнге бөледі.
А.ОЛЖАБАЕВА
Жылдам ақпарат алу үшін Facebook, Instagram желілері мен Telegram каналымызға жазылыңыз!