Әрбір ата-ана үшін баласының көз алдында жүгіріп жүргенінен асқан бақыт жоқ шығар, сірә. Өкінішке орай, бүгінде аса күтімді қажет ететін, ерекше балалардың қатары аз емес. Ал баласының өмірге ерекше болып келуі қандай ата-анаға да оңай соқпасы анық.
Осы орайда 1 – маусым халықаралық балаларды қорғау күні қарсаңында медицина мамандарының мүмкіндігі шектеулі балаларына тосын сый жасалды. Қайырымдылық шараны «Senim» Денсаулық сақтау жүйесі жұмыскерлерінің салалық кәсіптік одағы РҚБ облыстық филиалы мен облыстық денсаулық сақтау басқармасы ұйымдастырды.
Мерекелік кеште облыстық филиал төрағасы А.Аблайханұлы Мемлекет басшысының Жарлығымен жарияланған «Балалар жылы» аясында ерекше балалар мен олардың ата-аналары үшін арнайы қайырымдылық шара ұйымдастырып отырғанын атап өтті. Бүгінгі шарада денсаулық саласында жұмыс істей жүріп, ерекше бала бағатын 20 ата-ананың әрқайсысына материалдық көмек ретінде 100 мың теңгенің сертификаты берілді. Сондай-ақ балаларға тәтті сусындар тарту етіліп, сыйлықтар үлестірілді. Расында, қуанса, бала қуансын. Оның ішінде қамкөңіл жандарға көрсетілген көмек пен жылы мейірім оларға таудай күш сыйлары анық.
– Бүкіл әлем болып жаздың алғашқы күнін балғындардың тыныштығы мен болашағы қорғалатын күн ретінде тойлайды. Бүгінде мемлекет тарапынан балалардың бақытты да баянды өмір сүруіне қолайлы жағдай жасалуда. Өздеріңізге белгілі, биыл балалар жылы жарияланып, балаларға түрлі қамқорлық шаралары ұйымдастырылуда. Әсіресе, ерекше азаматтарға арналған көптеген бағдарламалар жүзеге асуда. Жалпы мұндай балаларды қоғамға бейімдеу мен сауықтыруда ерте кеңес беріп, емдеу маңызды. Қызылорда облысында бұл тұрғыда көптеген жұмыстар атқарылуда. Мәселен, облыстық көпбейінді балалар ауруханасы жанынан «Қамқорлық» оңалту орталығы ашылды. Сонымен қатар медицина қызметкерлерінің кәсіподағы тарапынан түрлі қамқорлық шаралары өтуде. Соның бірі бүгінгі қайырымдылық шарасы, − деді облыстық денсаулық сақтау басқармасының басшысы С.Пазылов.
Айта кету керек, бір реттік жәрдемақы тағайындау үшін арнайы комиссия құрылған. Осылайша іріктеуден өткен 20 балаға қаржылай көмек көрсетілді.
Нұрайым МАРАТҚЫЗЫ,
Қорқыт ата атындағы Қызылорда университетінің студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!