Әлемде спорттың жаңа дәуірі басталды. Сәт сайын көз ілеспес жылдамдықпен дамыған жаңа технология спорт саласын да айналып өткен жоқ. Бұған дейін жарыстар тек спорт алаңдарында өтсе, енді технология мен цифрлық мүмкіндіктер спортқа уақыт талабына сай өзгеріс енгізуге мүмкіндік берді. Соның айқын дәлелі – Астанада өтіп жатқан халықаралық Болашақ ойындары (Games of the Future). Бұл – физикалық спорт пен цифрлық әлемді біріктірген спорт сайысы. Яғни спортшылар бірде спорт алаңында бақ сынаса, одан кейін монитор алдында бәсекеге түседі. Бір атап айтарлығы, бұл киберспорт емес, дәстүрлі спорт пен цифрлы мүмкіндікті біріктірген жаңа буын жарысы.
Қатысушылар алдымен виртуалды кеңістікте өнер көрсетіп, кейін сол спорт түрінің нақты алаңдағы кезеңіне қатысады. Мұндай формат «фиджитал» (phygital) деп аталады. Бұл атау ағылшынның «physical» (физикалық) және «digital» (цифрлық) сөздерінен шыққан. «Болашақ ойыны» алғаш рет 2024 жылы Қазан қаласында өтті. Жобаның негізгі мақсаты – жаңа технологиялардың мүмкіндігін пайдалана отырып, жастар арасында спортты насихаттау және цифрлық дәуірге сай жаңа жарыс форматын қалыптастыру болды. Әлем назарын аударған ойын одан кейін Абу-Дабиде жалғасын тапты. Ал үшінші дода бүгінде Астанада өтуде. Ашылу салтанатына Өзбекстан, Қырғызстан, Тәжікстан мемлекетінің Президенті қатысты. Бүгінде елордаға 30-дан астам мемлекеттен 800-ге жуық спортшы келіп, жаңа буын ойындарында бақ сынауда. Ойынның ашылу салтанатында сөз сөйлеген Мемлекет басшысы Қасым-Жомарт Тоқаев бұл классикалық спорт пен кибериндустрияны тоғыстырған жаһандық фиджитал-қозғалысқа тың серпін беретінін айтты. Сондай-ақ спорттың күш-қуаты, ақыл-ой мен цифрлық дәуірдің әлеуеті үйлесім тапқан турнирдің баршаға ортақ жасампаздық ұстанымымен үндесетінін атап өтті.
– Бұл спорт пен интеллектінің үйлесімі, сонымен қатар күш-қайрат пен зияткерлік әлеуеттің бәсекесі. Олардың арасында қарама-қайшылығы жоқ, керісінше бір-бірін толықтыратын ұғымдар екеніне көзіміз жетіп отыр. Алдағы сайыстардың түпкі философиялық мәні де – осында. Осынау жаһандық ауқымдағы ойындар барша адамзаттың жарасымды әрі бейбіт болашағын айшықтайды. Қазақстан қашанда халықаралық қауымдастықпен бірге бейбітшілікті, қауіпсіздікті, әділеттілік пен дамуды қолдай береді.
Бұл турнир кереғар дүниелерді бір арнаға тоғыстырады. Оның негізінде шынайы және виртуалды әлем арасындағы ақылға қонымды тепе-теңдік жатыр, – деді Президент.
Халықаралық турнирде спортшылар фиджитал-футбол, фиджитал-баскетбол, фиджитал-жекпе-жек, фиджитал-шутер, фиджитал-би, Dota 2, Mobile Legends, Bang Bang, PUBG: Battlegrounds секілді 8 бағытта күш сынасуда. Бұл дода жаңа форматтағы халықаралық спорттық жарыстардың негізін қалап, әлем назарын аударды. Айта кетелік, бұл ойынның жүлде қоры да қомақты, 4,5 млн доллар. Сондай-ақ бұл ойынның астанада өтуі Қазақстанның цифрлық мүмкіндігін де көрсететіні сөзсіз. Жоғары деңгейдегі халықаралық спорт бәсекесінің елімізде өтуі үлкен мәртебе екені даусыз. Айта кетелік, бұл жарыс тек спортшылардың ғана емес, инженерлердің, бағдарламашылардың, ойын әзірлеушілердің және цифрлық технология мамандарының басын қосатын мүмкіндік алаңына айналды.
Гүлмира Мағлұмқызы
Жылдам ақпарат алу үшін Facebook, Instagram желілері мен Telegram каналымызға жазылыңыз!