Облыс әкімінің міндетін атқарушы Серік Қожаниязов тиісті сала басшыларымен өткен мәжілісте биыл жоспар бойынша 424,2 млрд теңге инвестиция тарту керектігін айтты.
Аймақта белгіленген меже бойынша соңғы төрт айда инвестиция тарту көлемі 136,8%-ға орындалып, Сыр өңірі республика бойынша алдыңғы қатарға шыққан. Былтыр да Сыр өңірі бұл бағытта жоғары көрсеткішке қол жеткізіп, бірінші орынға шыққан еді. Осы қарқыннан таймау биыл да міндеттелмек.
– Премьер-Министр өткен жылғы өңірге іссапары кезінде құны 1 млрд. теңгеден асатын 5-6 жобаны іске асыруды тапсырды. Сәуір айындағы актив отырысында облыс әкімі қала әкіміне 1 млрд теңгеден асатын 1 жобаны, әр ауданның әкіміне 500 млн теңгеден асатын 2 жобаны биыл іске қосуды тапсырған болатын. Оның орындалуы Мемлекет басшысының тапсырмасымен әзірленген жалпыұлттық жобалар пулы аясында бақыланады, – деді Серік Салауатұлы.
Мәжілісте әр жоба жеке бақылауға алынатындығы айтылды. Сондай-ақ туындаған мәселелер қолданыстағы заңнама аясында шешілуі керек. Осы орайда облыс әкімінің міндетін атқарушы Серік Қожаниязов облыстық энергетика және тұрғын үй-коммуналдық шаруашылық басқармасына Қызылорда қаласы және Шиелі ауданы әкімдіктерімен бірлесіп, жаңа жылу электр орталығының құрылысын бастауды тапсырды. Бұл ретте Шиелі ауданындағы күн электр станциясына қажетті жер телімін алуға сүйемелдеу жасау жүктелді.
А.СЕЙІЛ
Сурет: Егемен Қазақстан
Жылдам ақпарат алу үшін Facebook, Instagram желілері мен Telegram каналымызға жазылыңыз!