Бұл өнімнің өзгелерден ерекшелігі – адам ағзасына өте пайдалы екендігі. Мақсары майы әлемдік дамыған елдерде сұранысқа ие. Сондай-ақ қымбатқа бағаланады. Жасыратын несі бар, өкінішке орай қазақстандықтар мақсары өнімін мүлде қолданбайды десек те болады. Сөйтсек, мұнымыз ерекше қасиетке ие дақылдың көл-көсір пайдасын білмегендіктен екен.
Аймақтағы «АВ Invest group» ЖШС кәсіпкерлігін Ғалым Дүйсенбаев пен жары Гүлжауһар Дүйсенбаева екеуі 2016 жылы бастады. Кәсіп иелері Ғалым білікті заңгер болса, Гүлжауһар дәрігер. Олар әдепкіде пісте майын шығаруды көздеген. Дегенмен үлкендердің кеңесі мен жан жақты зерттеуден кейін 2017 жылы «Рафинатталмаған суық сығындылы мақсары майын» шығаруды бастады. Оның суық сығындылы деп айтылуының басты себебі – 70 градустан аспайтын температурада мақсарыны қыздырады. Ең алдымен дән тазаланады. Сосын қосалқы құрылғылардан өтіп, пресске түсіп сығылып, май тұнады. Содан соң маталы фильтрден өткізіп, арнайы құтысына құйылады. Осылайша таза 100 процент табиғи мақсары майы өндіріледі.
Бұл адам денсаулығына өте пайдалы өнім. Оны тұрақты түрде пайдалану асқорыту жүйесін қалыпқа түсіріп, холестерин дәрежесін төмендетіп, жүрек-қан тамыр ауруларының алдын алады. Мақсарының тағы да бір ерекше қасиеті қатерлі ісік ауруына душар болу қаупін сейілтеді екен. Оның құрамында Е, К дәрумендері, «омега 6» және темір бар. Айта кету керек, «зәйтүн» майы линоль қышқылы арқылы пайдалы болса, ал мақсарыда линоль қышқылы екі есеге көп. Ол – адам ағзасына өте пайдалы. Әсіресе қан тамыры мен жүйке жүйесіне әсері мол. Сонымен қатар диабет ауруын емдеудегі мақсары майының ерекшелігін айтпай кетуге болмайды. Бұл майдың диабетті қадағалап, қандағы қант құрамын бірқалыпты ұстап тұрады.
– Елдегі карантиндік шектеу басталғалы бір жыл мақсары майын шығаруды тоқтаттық. Осы жылдан бастап, қайта қолға алудамыз. Бүгінде сатылу бағасы 4000 теңгені құрайды. Бірақ қазір 3500 теңгеден сатылуда. Бұл ең төмендетілген баға. Мұндағы мақсатымыз бізге пайда болмаса да, халық осы майдың денсаулыққа пайдасын түсініп, дәмін көрсін, халыққа пайдамыз тисе екен дейміз. Айта кету керек, көбі пісте майынан мақсары май неге қымбат деп жатады. Мәселен, пістенің 1 тоннасынан 40-45 процент май алынады. Ал мақсары дәні 15 проценттен артық май бермейді. Сондықтан мақсары майдың өз құны біздің сатып жатқан бағадан да жоғары. Мақсары майына шетелдіктердің қызығушылығы өте жоғары. Қытайда бұл майдың қолданыста болғанына үш жарым мың жыл болды. Ал түркиялықтар екі мың жылдан бері пайдаланады. Қазір біздің Түркия мен Қытайда серіктестеріміз бар. Алдағы уақытта шекара ашылса, өнімді соларға экспорттаймыз. Бүгінде денсаулығына алаңдайтын әрбір адам осы мақсары майын тұтынады. Атап айтсақ, қант, тері аурулары мазалайтын адамдар тұрақты тұтынушыларымыз. Сондықтан халыққа да кеңінен жеткізгіміз келеді. Біз де бұл өнімді шетел асырғанша, өз еліміздің тұтынғанын қалаймыз. Дәрігер ретінде халықтың денсаулығын жақсарту үшін осы майды ұсынар едім, – деді «АВ Invest group» ЖШС қаржы директоры Гүлжауһар Дүйсенбаева.
Оның айтуынша, мақсары майы АҚШ пен Жапония секілді дамыған елдерде жоғары бағаланады. Былайша айтқанда, құны біздегіден он есе қымбат. Шетелдіктер оны тек тағамға ғана емес, массаж жасауға, шаш, тері күтіміне қолданады. Сондықтан мақсары майының қасиеті туралы қазақстандықтарға толығырақ ақпарат беруіміз керек, – дейді ол.
Расында, өзгеден өзіміздің өнім артық. Май зауытының іске қосылғанына көп бола қоймаса да қаншама асуларды бағындырып, мақсары майы жоғары бағаланып келеді. Атап айтсақ, 2018 жылы «Қазақстанның үздік тауары» өңірлік көрме байқауында «Үздік азық-түлік тауарлары» бойынша жеңімпаз атанды. Сондай-ақ «Сауда үздігі-2018», «Үздік сатылған тауарлар» аталымы бойынша аймақтық көрме-конкурстың жеңімпазы тағы басқа да марапаттарды иеленді.
Бүгінде май зауыты айына 40 тонна мақсары майын өндіруде. Қазір өндіріс орны 7 адамды жұмыспен қамтып отыр. Алдағы уақытта елден сұраныс артса, өнімді де екі-үш есе арттыруға күш салмақ. Ал кәсіпорын мақсары дәнін аймақтағы жеке егін шаруашылықтарынан сатып алуда. «Еңбек етсең ерінбей, тояды қарның тіленбей» деген тәмсілді берік ұстанған кәсіпкерлердің басты мақсаты – мақсары майының пайдасын халыққа кеңінен түсіндіру. Ендеше, Сырдан шығатын өнімді өзіміз тұтынайық.
Ақмарал ОЛЖАБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!