Кеше жүрген жолыңмен бүгін жүре қалсаң, алдыңда тас бұғау. Ар жағында жол компанияларының қызметкерлері қызу тірлікті бастап кеткен. Қызылордадағы бұл көрініске қазір үйренісіп те қалдық. Әдепкі кезде күйгелектеніп, «Ай, қап!» деп жататын жүргізушілер қазір «Е, мына көшені де жөндеп жатыр екен» деп кері айналып кете береді. Жаңарып жатқан жолдардың жайын зерттеп, қаладағы осы бағыттағы жұмыстарға бір сәт көз жіберген едік.
Биыл облыстың бас шаһарында жол-көлік инфрақұрылымын дамыту бағыты бойынша 34,8 миллиард теңге қаражат бөлінді. Былтыр бұл көрсеткіш 12 миллиард теңге болатын. Енді биылғы қаржыға 97 көшеге жол құрылысын салу, қайта жаңғырту, күрделі және орташа жол жөндеу жұмыстары жүргізілуде.
– Тұрғындар мен қала қонақтарының жүріп-тұруына қолайлы жағдай жасау үшін қалаға кіре беріс жолдарға, оның келбетіне аса мән беріп жатырмыз. Ол үшін әуежай жолы мен Шиелі ауданынан қалаға кіреберіс жолдарды кеңейту жұмыстары жүргізілсе, «ҚазАвтоЖол» ҰК» АҚ арқылы «Қызылорда-Құмкөл» автомобиль жолын қайта жаңғырту үшін техникалық-экономикалық негіздеме дайындалуда. Сонымен қатар Астана қаласынан кіреберіс – Сағымбаев көшесін қайта жаңғырту үшін жоба-сметалық құжаттама әзірленуде. Қаланың магистралды Яссауи мен Жаппасбай батыр көшелері кеңейтілуде, – дейді қала әкімінің орынбасары Ғалымжан Еркебай.
Әрине, жол құрылысы қаланың өзекті мәселелерінің бірі болатын. Әйтсе де алты айда атқарылып, ел игілігіне берілген жұмыстар жұртшылықтың оң бағасын алып үлгерген.
– Осы кезеңге дейінгі жұмысты айтсақ, Елеу Көшербаев көшесі қайта жаңғыртылды, ал Н.Назарбаев даңғылынан Тәуелсіздіктің 25 жылдығы даңғылына дейінгі жаңадан жол құрылысының жұмысы да өздеріңіздің көз алдарыңызда. Жалпы айтқанда, 96 көшеге күрделі және 34 көшеге орташа жол жөнделеді. Мақсат та, мүдде де – тұрғындардың сапалы өмір сүруіне қолайлы жағдай туғызу, – дейді әкім орынбасары.
Тақтайдай тегіс асфальтта зырғыған көліктер күні кешегі шаңы бұрқырап, айналасы айран-асыр болып жатқан көріністің жемісі екені анық. Әйтсе де жаяу жүргіншілер жолына келгенде көп жерде сын садағына ілінген тұстар бар. Бүгінде халықтың жүріп-тұруына сапалы жағдай жасауды ойға алған қала басшылығы мұны да ескеріп, мердігерлердің жауапкершілігіне салғаны да есімізде. Қайткен күнде де жаяу жүргіншілер жолы жаңарып, қаланың сәнін келтіріп тұрғанын айту керек.
– Биыл құны 2,3 млрд теңге болатын 54 көшеге жаяу жүргіншілер жолы салынуда. Оның ішінде 40 көше қала аумағында болса, Тасбөгет кентіне 6 көше, Белкөл кентіне 1 көше, ал Қарауылтөбе ауылына 7 көше қаралған. Жарықтандыру жайы да назардан тыс қалған жоқ. Биыл 81 көшені жарықтандыруға 1,4 млрд теңге бөлінді. Оның 54 көшесі Қызылорда қаласына бағытталса, Тасбөгеттегі 6 көшеге, Сабалақтағы 15 көшеге, Белкөлдегі 5 көшеге және Ақжарма ауылдық округіндегі 1 көшеге де жарық шамдары орнатылады, – дейді Ғ.Еркебай.
Көрікті қала, келбетті өңірге айналып келе жатқан сұлу Сырдың төріндегі – Қызылорда да алдағы уақытта саябақтар да көбейе бермек. Бұрын-соңды назардан тыс қалған сверлер мен аллеялар да қайта жаңғыртылып, тұрғындарға сая болмақ. Мұндай үлгідегі жасыл алаңқайлар қаланың барлық аумағында қолға алынады.
Дәулет ҚЫРДАН,
Жылдам ақпарат алу үшін Facebook, Instagram желілері мен Telegram каналымызға жазылыңыз!