Сейсенбі, 16 шiлде, 02:04

  • Қаз
  • Qaz

Бізге жаңалық
жіберіңіз:

+7(702)932-52-25
Жаңа шығарылым
№56-2066
16.07.2024
PDF мұрағаты

Қазақы тазыны  танимыз ба?

13.05.2023

771 0

«Nationalgeographic.kz» қазақы тазының стандарты туралы жазды. «Бойы орта және ортадан жоғары, денесі мығым, арықтау ит, созылу индексі – 103», – делінген Қазақстан Республикасы Экология және табиғи ресурстар министрінің міндетін атқарушының 2023 жылғы 30 наурыздағы № 101 бұйрығымен бекітілген Қазақы ит тұқымдарының стандартында.

Осы құжаттағы сипаттамаға сүйенсек, қазақ тазысының ұрғашысы төбетіне қарағанда аласалау, шағындау болады. Төбеттің шоқтығының биіктігі 60-70 см, ал ұрғашы тазының бойы 55-65 см болады. Түсі қара, ақ, сарғыш, қызыл және сұр түстердің барлық реңкі болуы мүмкін. Тұтастай бір өңді де болады, теңбіл түстілері де кездеседі. Кейбірінің тұмсығында, құлағында, аяқтарының ұшында қара дақтар кездеседі. Күшіктер өсу, жыныстық жетілу барысында түсі мен реңін өзгертуі мүмкін. Жүні жұмсақ, жібек тәрізді, тік, ұзындығы қыста 4,5 сантиметрге, жазда 2,5 сантиметрге дейін өседі. Қысқа жүнді түбіті жақсы дамыған. Құлағының ұшында 5-6 сантиметрдей жұмсақ, ұзындау түк жиналып ары қарай ұйпаланады, алдыңғы аяғының, жамбастарының артқы жағында ұзындау жүн түбітке айналады. Құйрығының төменгі жағына қарай жұқалау  ілгек жүні  (10 сантиметрге дейін) болады. Башпайларының арасында қысқа әрі қатты түк өседі. «Жарғақ құлақ», «тықыр тазы» секілді түрлері де кездеседі.

Арық, сопақ, бас сүйегі біркелкі жалпақ болып келеді. Үстінен қарағанда сына тәрізді. Желкесі біркелкі, ал төбе сүйегі өте нашар дамыған деп сипатталған Министрлік бекіткен тазы стандарты туралы құжатта.

Экология және табиғи ресурстар министрлігі Орман шаруашылығы және жануарлар дүниесі комитетінің сайтында осы құжат туралы төмендегідей ақпарат жарияланған.

«2023 жылдың 31 наурыз күні «Қазақстан Республикасының кейбір заңнамалық актілеріне қазақы ит тұқымдарын сақтау және өсімін молайту мәселелері бойынша өзгерістер мен толық­тырулар енгізу туралы» Қазақстан Республикасының Заңын іске асыру аясындағы шаралар туралы» ҚР Премьер-Министрі­нің 2023 жылғы 22 ақпандағы №34-р өкімін іске асыру шеңберінде, ҚР Экология және табиғи ресурстар ми­нистрлігі қазақы ит тұқымдары – тазы мен төбеттің стандарт­тарын бекітті. Стандарттар аталған ит тұқымдарының сипатта­ма­сын, өлшемдерін, кемшіліктері мен ақауларын қамтиды.

Заңға сәйкес, қазақы ит тұқымдарының стандарттарын әзірлеу 2023 жылғы шілдеде іске қосылатын Ұлттық орта­лықтың құзіретіне кіреді. Алайда уақыттың тығыздығына байланысты Қазақстан Республикасы Ауыл шаруашылығы министрінің 2015 жылғы 25 желтоқсандағы №3-3/1119 бұй­рығымен бекітілген стандарттар негізге алынған.

Шыны керек, бүгінде тұқымы азайған тазыны танымай жатамыз. Оның үстіне, қазақы тазыны алыстан танитын аңқұмар қазақ та азайып барады.  Кейінгі ұрпақ қазақы тазы­ның қандай екенін тек кітаптан ғана оқымаса болғаны.

 


 

Жылдам ақпарат алу үшін Facebook, Instagram желілері мен Telegram каналымызға жазылыңыз!

Тағы да оқыңыз: