Кәсіпкерлігі қарқын алған өңірімізде азық-түлік өндірісі де өркен жайып келеді. Жұртшылық Сырды бұған дейін ақмаржанымен таныса, енді шоколад, шұжық сынды өнімдерін білетін болады.
Бүгінде аймақтың бас шаһарында шұжық өндіріледі. Бұл кәсіпті қала тұрғыны Қанат Мажитов 3 ай бұрын қолға алған. Қарапайым қызметкердің аяқ асты кәсіп бастауына мына жайт себеп болса керек.
– Кезекті демалыс кезінде жол түсіп Қарағандыға достарыма бардым. Сондағы таныс жігіт бізді өзінің шұжық дайындайтын цехына шақырды. Сол жерде бұрын-соңды білмейтін шұжық дайындау технологиясына куә болдық. Осы сапардан кейін өзіміздің өңірде де «осы кәсіпті неге қолға алмасқа?» деген ой келді. Әрі қазіргі тұтынатын шұжықтарды халал дегенімен, қандай жағдайда әзірленетінін білмейміз ғой. Ал бұл таза табиғи өнімнен дайындалады. Яғни халқымыздың о бастан мінсе көлік, ішсе сусын, жесе азық қылған жылқы, сиыр, қой етінен жасалады. Сондықтан ойға алған істі бастауға ниет еттік, – дейді кейіпкеріміз.
Осылайша жаңа өндіріс цехы іске қосылады. Алдымен қажетті шикізатпен қамтамасыз ету үшін қаладағы мал шаруашылығымен айналысатын кәсіпкермен келісімге келеді. Осы орайда кейіпкеріміз шикізат көзі болған жылқы, сиыр, қой түлігінің тек өзіміздің аймақта өсірілетінін ерекше атап өтті. Сондай-ақ оны өздерінің цехында сойып, тазалап, өндіріске жібереді.
– Шұжық дайындау технологиясын мамандар он күн көлемінде қарағандылық кәсіпкерден үйренді. Өнімді әзірлеуге шамамен төрт күн уақыт кетеді. Алдымен жаңа сойылған ет тұздалады, одан соң түрлі дәмдеуіштер қосылады, кептіріледі, арнайы аппаратта ысталады. Сосын бабына келгенше мұздатқышқа салынады. Бесінші күн дегенде ғана дайын өнім сатылымға шығарылады. Сақталу мерзімі – 6 градус салқында 30 күн шамасында. Ал пайдаланғаннан кейін 1-2 тәулікте жеп қоймаса, тез бұзылады. Бұл еш қоспасыз таза өнім болғасын кәдімгі шұжықтардан дәмі бөлек, сондай-ақ тез бұзылатындықтан көлемі де шағын, – деді өнімді таныстырған кәсіпкер.
Қазір цехта жылқы, сиыр, қой, тауық етінен шұжық шығарылады. Одан бөлек ысталған құйрық май, ысталған бауыр шұжығы, қақталған ет өнімдері де бар. Кәсіпкер Қанат өнімдердің дәмінің бастапқы кезде басқаша болғанын айтады. Бірте-бірте қол үйренісіп, әдісін алғаннан кейін шұжықтардың дәмі кіріп, сұраныс артыпты. Десе де бұл өнімдер әзірге Арай шағын ауданындағы «Ауылым» дүкені мен қаладағы «Ажар», «Қызылорда» супермаркетінде сатылымға шығады. Алдағы уақытта қала аумағы мен аудандарды өзіміздің өніммен қамту көзделіп отыр.
Кәсіпкер әңгіме барысында Қызылордадан шығатын өнімдердің қатарын толықтырғысы келетінін жасырмады. Соның бірін жақын күндері жүзеге асырғысы келеді. Қажетті жабдықтарды алдыртып жатқанын айтқан ол сәті келсе балалар күні мерекесі қарсаңында сиыр сүтінен дайындалған балмұздақтың 5 түрін сатылымға шығармақ.
Суретті түсірген
Нұрболат НҰРЖАУБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!