Қазақстанның еңбек сіңірген қайраткері, дәстүрлі әнші Айгүл Елшібаева тойды садақаға айналдырып алғандарды сынады, – деп хабарлайды Massaget.kz.
«Алжыған Уахаптар! Қыз баланы құран оқып, өлік жөнелткендей ұзатқан не масқара. Көрген көзде жазық жоқ. Уахаптар салт-дәстүрге қарсы болсаңдар, құран оқып ұзатқанша, ұзату тойын жасамай, үйлерінен жібере салсаңдаршы, салт-дәстүрімізді қор қылмай», – деп жазды ол әлеуметтік желідегі парақшасында.
Дәстүрлі әнші қыз ұзату қазақ халқының салт-дәстүріне жататынын айтып, мұны арабтардың дәстүрімен араластырмауды құптайтынын жеткізді.
«Қыз ұзату салт-дәстүрімізге жатады. Аялап өсірген қызын, жат ұяға беру – қимастығының белгісі. Араптарда күң-құл сату, әйелдің билігі екінші орында болғандықтан, қазақтың дәстүріндей қыз балаға құрметі жоқ. Тойды садақаға айналдырған, садақа мен қыз ұзату салт-дәстүрді айыра алмаған дүбара сауатсыздар. Уахап шейхтарыңа ұнаймын дегенше, өле қалыңдар, қазақ болмай кеткірлер», – деп ашулы жазба жариялады дәстүрлі әнші.
Айгүл Елшібаеваның жазбасынан дінді дұрыс ұстанбай жүргендерге қарсы ашу-ыза байқалады.
«Ұлтымыздың тәрбиелі, мағыналы қыз балаға ақ тілегімен құрмет көрсеткен салт-дәстүрін садақаға айналдырмаңдаршы. Ислам діні, Абу Ханифа мазхабын ұстаған қазақ неше ғасыр мұндай сұмдықты көрмеген шығар! Осылардыкі дұрыс па, ағайын?», – деп жазды ол желіде.
Айгүл Елшібаеваның әлеуметтік желідегі оқырмандары бірі қалмай оның пікіріне қолдау білдіріп жатыр.
Жылдам ақпарат алу үшін Facebook, Instagram желілері мен Telegram каналымызға жазылыңыз!