Көктем басталысымен қалада санитарлық тазарту және арық жүйелерін тазалау жұмыстары белсенді түрде жалғасуда. Қазіргі таңда облыс орталығында аяқсуды толық беру үшін су өткізу арналарындағы қоқыстар алынып, тиісті жұмыстар атқарылуда.
Шаһар басшысының тапсырмасына сәйкес, қала әкімінің орынбасары Арнұр Нұрмағанбетов арық жүйелерінің жай-күйіне, аяқсудың қалыпты берілу барысын аралап көрді. Аралау барысында Желтоқсан, Сағымбаев, Скатков көшелері мен Қызылжарма каналының санитарлық жағдайы және су өткізу қабілеті бақылауға алынып, жауапты мекемелерге тиісті тапсырмалар берілді.
Бүгінде қала аумағында жалпы ұзындығы 98,6 шақырымды құрайтын арық жүйесі бар. Оның басым бөлігіне аяқсу толық жеткізілген. Арық жүйелеріне 12 аумақта орналасқан 19 насос қондырғысы арқылы су берілуде. Ал Қызылжарма каналындағы қайта жаңғырту жұмыстарына байланысты жақын күндері насостар қосылып, аяқсу жіберілетін болады. Бүгінгі күнге дейін аяқсу жүйелерін дайындау аясында қала орталығындағы көшелерде тазалау және қалпына келтіру жұмыстары жүргізілген. Сонымен қатар «KazstroyCapital LTD Kyzylorda» ЖШС-мен бірлесіп, жерасты ұңғымалары арқылы су жеткізу жұмыстары атқарылуда. «Қызылорда тазалығы» мекемесі арық және канал жүйелерін тазалау, қалпына келтіру және аяқсумен қамтамасыз ету жұмыстарын қарқынды атқаруда. Атап айтқанда, аяқсу жетпейтін жерлерге арнайы техника арқылы су тасымалданып, ағаштар жоспарлы түрде суарылуда. Бұл жұмыстарға арнайы мекемелердің техникасы жұмылдырылған. Одан бөлек, су үнемдеу технологияларын енгізу және су жеткізу тиімділігін арттыру бойынша жұмыстар қолға алынған.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!