Қазіргі қоғамда жұмыспен қамту мәселесі экономикалық дамудың ғана емес, әлеуметтік тұрақтылықтың да маңызды көрсеткіші болып саналады. Жұмыссыздық деңгейінің артуы халықтың тұрмыс сапасына тікелей әсер етіп, кедейлік, әлеуметтік теңсіздік және көші-қон сияқты өзекті мәселелерді күшейтеді. Сондықтан мемлекет үшін тиімді жұмыспен қамту саясатын қалыптастыру – басты міндеттердің бірі.
Соңғы жылдары қала экономикасында орасан зор өзгерістер орын алуда. Атап айтқанда, еңбек нарығындағы жұмыссыздық деңгейінің төмендеуі және жұмыспен қамтылған халықтың тұрақты өсуі байқалады.
Бұл адамдардың жұмыс табуына жақсы мүмкіндік. Қалада өткізілген жұмыс жәрмеңкесі осындай мақсатты көздейді. Қала әкімдігімен «Мансап орталығы» бірлесіп, орталық филиалында ұйымдастырған жәрмеңкеге жұмыс берушілер де, іздеушілер де қызығушылық танытты. Оған жұмыс іздеп жүргендер және жоғары оқу орындары мен колледж түлектері қатысты.
Жәрмеңкеде қаладағы 9 мекеме 172-ден астам бос жұмыс орнын ұсынды. Әрине, әркімнің таңдауы бар. Қатысушыларға еңбек нарығындағы мүмкіндіктер, мемлекеттік бағдарламалар аясындағы қолдау шаралары мен кәсіпкерлік бастамаларды дамыту жолдары түсіндірілді. Қорытындысында 35 адам тұрақты жұмыс тапты. Ал 14 жас маман жастар тәжірибесі арқылы жолдама алды.
Сонымен қатар субсидияланатын жұмыс орындары бағдарламалары бойынша да жүйелі жұмыстар жүргізілуде. Қоғамдық жұмыстарға 2026 жылы 950 адамды тарту жоспарланса, жыл басынан бері 285 мекемемен келісімшарт жасалып, 1219 адам жолданды. Олардың 212-сі – мүгедектігі бар азаматтар. Әлеуметтік жұмыс орындары бойынша 4 мекемемен келісім жасалып, 8 адам жұмысқа жіберілді.
Ұлттық статистика бюросының мәліметіне жүгінсек, республикада жұмыс таба алмай жүргендердің саны былтырғы бірінші тоқсандағы 451 515 адамнан биылғы бірінші тоқсан қорытындысында 446 049 адамға дейін азайған. Бұл еңбек нарығындағы оң үрдістердің қалыптасып келе жатқанын көрсетеді.
Зерттеулерге сүйенсек, бүгінде Қазақстан экономикасының түрлі саласында 9,4 млн адам жұмыспен қамтылды. Оның ішінде 7,3 миллионы жалдамалы жұмыспен айналысса, 2,1 млн адам өзін-өзі жұмыспен қамтыған.
Жұмыспен қамтылғандардың басым бөлігі сауда, білім беру, өнеркәсіп және ауыл шаруашылығы салаларында еңбек етеді. Жұмыспен қамту бағытындағы мұндай шаралар азаматтардың тұрақты табыс табуына, еңбек нарығындағы сұраныс пен ұсыныстың үйлесуіне және өңірдің әлеуметтік-экономикалық дамуына оң ықпал етуде.
«Ақмешіт-ақпарат»
Жылдам ақпарат алу үшін Facebook, Instagram желілері мен Telegram каналымызға жазылыңыз!