Соңғы қоңырау таяды. Әдеттегідей бұл уақытта мектеп бітіру кеші мен ұстаздарға берілетін сыйлық көп айтылатын тақырыптардың бірі. Жылда қатал талап қойылғанымен, жасырын болса да мейрамханаларда тойланып, ұстаздарға қымбат сыйлық сыйланады. Тіпті түлектер кортеждер ұйымдастырып көзге де түсті. Алайда, биыл қателікке жол жоқ. Себебі, министрлік бақылауды күшейтті. Бітіру кештерін мектептен тыс жерде өткізуге тыйым салынды.
Оқу-ағарту министрлігінің мәліметінше, аттестаттарды табыстау рәсімі тек білім беру ұйымдарының ғимараттарында ұйымдастырылуы тиіс. Сондай-ақ білім алушылардан, олардың ата-аналарынан немесе заңды өкілдерінен қаражат және өзге де материалдық құндылықтарды жинауға қатаң тыйым салынған.
«Белгіленген талаптарға сәйкес, бітіру кештерін білім беру ұйымдарынан тыс жерлерде ұйымдастыруға рұқсат етілмейді. Жергілікті атқарушы органдарға қаржылық шығындарды талап етпейтін тәрбиелік және мәдени-ағартушылық іс-шараларды ұйымдастыру және түсіндіру жұмыстарын жүргізу тапсырылды», – делінген министрлік таратқан хабарламада.
Ал Ішкі істер органдары тарапынан құқық бұзушылықтардың алдын алу, қоғамдық тәртіпті сақтау және білім алушылардың қауіпсіздігін қамтамасыз ету бойынша шаралар тапсырылды.
Оқу-ағарту министрлігі ескертті
Оқу жылының аяқталуына орай 25 мамыр күні барлық мектептерде «Білімім – Отаныма!» тақырыбында бірыңғай сынып сағаты өткізіледі. Сынып сағаттарында оқу жылы қорытындыланып, оқушылардың жетістіктері мен жарқын сәттері еске алынады. Сондай-ақ оқушыларға жазғы каникул кезінде оқуға ұсынылатын әдебиеттер мен көруге ұсынылатын фильмдер тізімі таныстырылады.
– Аймақта биылғы оқу жылын 320 мектептің 1–11 сыныптарында білім алатын 189288 оқушы аяқтауда. Оның ішінде 11-сыныпты 10317 түлек бітіреді. Басқарма тарапынан арнайы бұйрық қабылданып, барлық білім беру ұйымдарының басшыларына мектеп бітіруші түлектердің ата-аналарымен түсіндіру жұмыстары жүргізілді. Онда сән-салтанатқа негізсіз қаржы жұмсаудың орынсыздығы айтылып, қарапайымдылық қағидатын сақтау қажеттігі ескертілді. Сондай-ақ мерекелік дастархан ұйымдастыруға, жалдамалы автокөліктермен қала ішінде немесе қала сыртында серуендер мен экскурсиялар өткізуге, емтихан кезінде дастархан жаюға, сынып жетекшілеріне сыйлық жинау сияқты әрекеттерге жол бермеу қатаң тапсырылды. Оқу жылының аяқталуына байланысты ұйымдастырылатын барлық іс-шаралар басқарманың тұрақты бақылауында болады, – деді облыстық білім басқармасы басшысының орынбасары Асхат Қанатұлы.
Түлектер қауіпсіздігі басты назарда
Мектеп бітіру мерекесіне орай оқушылардың қауіпсіздігін қамтамасыз ету және құқық бұзушылықтың алдын алу мақсатында облыс көлемінде арнайы шаралар қолға алынуда. 25 мамырда мектеп бітірушілерге арналған «Соңғы қоңырау» мерекелік іс-шарасы кезінде қоғамдық тәртіпті сақтау мен төтенше жағдайлардың алдын алу мақсатында полиция қызметкерлері күшейтілген режимде жұмыс жүргізеді. Облыс бойынша қоғамдық тәртіп пен жол қауіпсіздігін қамтамасыз етуге 492 қызметкер мен 111 қызметтік автокөлік жұмылдырылмақ.
– Облыс орталығының өзінде қауіпсіздікті қамтамасыз ету мақсатында 216 полиция қызметкері мен 45 қызметтік автокөлік қызмет атқарады. Бұдан бөлек, мерекелік іс-шаралардан тыс уақытта да қаладағы қоғамдық орындар мен көшелерде тәулік бойы қосымша тәртіп сақшылары кезекшілік етеді. Соңғы жылдары мектеп бітіру кештерінде орын алатын кейбір жауапсыз әрекеттер қоғам назарын аударып келеді. Әсіресе автокөлікпен кортеж ұйымдастыру, жол қозғалысы ережелерін бұзу, көлік терезесінен шығу, қоғамдық орындарда тыныштықты бұзу сынды жағдайлар адам өмірі мен қауіпсіздігіне тікелей қауіп төндіреді. Өкінішке қарай, мұндай әрекеттер мерекелік сәтті қайғылы жағдайға айналдыруы мүмкін. Осыған байланысты полиция қызметкерлері білім беру ұйымдары маңында және қоғамдық орындарда профилактикалық жұмыстарды күшейтеді. Құқық қорғау органдары ата-аналар мен түлектерді заң талаптарын сақтауға шақырады. Құқық бұзушылық анықталған жағдайда заңнамаға сәйкес әкімшілік шаралар қабылданатынын ескертеміз, – деді ПД қоғамдық қауіпсіздік басқармасы басшының орынбасары Рауан Алдешов.
Қоғамдық тәртіп пен қауіпсіздікті сақтау – тек полицияның ғана емес, әр азаматтың ортақ міндеті. Әсіресе, ата-аналардың жауапкершілігі маңызды. Балалардың қауіпсіздігіне бейжай қарамай, олардың мерекені мәдениетті әрі қауіпсіз өткізуіне бағыт-бағдар беру – басты міндеттердің бірі.
Соңғы қоңырау – өмірдің жаңа белесіне бастар қадам. Сондықтан бұл күн әр түлек үшін қуанышты, жарқын әрі қауіпсіз естелік болып қалуы тиіс. Әр түлектің өміріндегі ең маңызды мереке тек жақсы жағынан есте қалғаны дұрыс.
Айтолқын БАТЫРБАЙҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!