Соңғы күндері «WhatsApp» және басқа да әлеуметтік желілерде Қызылорда қаласына «басқа өңірлерден рейд келеді», «жасырын патрульдер шығады» деген мазмұндағы хабарламалар тарады. Бұл жаңалықты естіген кейбір жүргізушілер көліктерін тексеріп, алғашқы көмек қобдишасы, өрт сөндіргіш және басқа да қажетті құралдарды жаппай іздей бастады. Тіпті кей дүкендерде мұндай заттарға сұраныс уақытша көбейіп, тапшылық байқалғаны да айтылды.
Әлеуметтік желіде тараған хабарламаларда көлікке қойылатын талаптар тізімі де көрсетілген. Онда қосалқы дөңгелек, жазғы шиналардың толық жиынтығы, домкрат, болттар, әйнек жағдайы, дәрігерлік қобдиша, өрт сөндіргіш, авариялық белгі, трос, сақтандыру полисі, техникалық байқау, шамның дұрыстығы және басқа да көптеген шарт тізбектелген. Алайда бұл талаптардың бір бөлігі нақты ережелерге сәйкес келсе, бір бөлігі асыра айтылған немесе толық расталмаған ақпарат екені байқалады.
Халық арасындағы дүрбелеңнен кейін біз де жүргізушілер жиі іздейтін алғашқы медициналық көмек қобдишасы мен өрт сөндіргіш құралдарын алу үшін автодүкендерді аралап көрдік. Алайда біз аралаған дүкендердің барлығында сатушылар бұл тауарлардың таусылғанын, кейбірінің әлі жеткізілмей жатқанын айтты.
Осындай жағдайға тап болған қала тұрғыны Бағлан да бір күнін қажетті жабдықтарды іздеумен өткізгенін айтты. Оның сөзінше, әлеуметтік желідегі ақпараттан кейін көлігін толық тексеріп шығуға кіріскен, алайда ең алдымен қажет болған дәрігерлік қобдишасын табу қиынға соққан.
Осы жағдайға байланысты Қызылорда облыстық полиция департаментінің баспасөз қызметі түсініктеме беріп, таралған ақпараттың жалған екенін ресми түрде мәлімдеді. Яғни, әлеуметтік желілерде тараған «арнайы рейд келеді», «жаппай тексеріс болады» деген хабарламалар шындыққа сәйкес келмейді.
Полиция департаментінің мәліметінше, жол қозғалысын бақылау және тәртіпті қамтамасыз ету жұмыстары жоспарлы түрде, заң аясында тұрақты жүріп отырады. Бірақ әлеуметтік желідегі жазбалардағыдай арнайы «сырттан келетін рейд» туралы ақпарат шындыққа жанаспайтынын айтты.
Әлеуметтік желілерде тексерілмеген ақпараттар тез тарап, жүргізушілер арасында алаңдаушылық туғызды. Соның салдарынан кейбіреулер көліктерін алдын ала тексеріп, қажетті жабдықтарды іздеуге көшті, ал нарықта сұраныс уақытша артты.
Көлік құралдарының техникалық талаптары мен жол қозғалысы ережелері бұрыннан бар және тұрақты. Мамандардың айтуынша, мұндай жағдайлар жиі кездеседі және олар негізінен тексерілмеген ақпараттың тез таралуынан туындайды. Сондықтан кез келген хабарламаны ресми дереккөздерден алу қажет.
Думан РАХЫМЖАНҰЛЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!