Әлеуметтік салаға мемлекет тарапынан үзбей қамқорлық жасалуда. Зейнеткерлердің де денсаулығы, салауатты өмір салты, тыныс-тіршілігі қоғам назарынан тыс қалған емес. Жұмыссыздықпен де күрес нәтижесі жемісін беріп келеді. Бүгінде қиын жағдайға ұшыраған аналарға көмек қолын созу мемлекеттің басты бағдарына айналып, халық қалаулыларының тұрақты бақылауында.
Қалалық мәслихат төрағасы И.Құттықожаев, депутаттармен бірге Қызылорда қалалық мәслихатының кезекті сессиясында қаралатын негізгі мәселе – «Қызылорда қаласы бойынша әлеуметтік тұрғыдан осал топтағы жандарға көмек көрсету және оларды жұмыспен қамтудың жай-күйімен» танысып, талқылау мақсатында облыстық жұмыспен қамтуды үйлестіру және әлеуметтік бағдарламалар мен облыстық денсаулық сақтау басқармасы басшыларының орынбасарлары, қалалық ардагерлер кеңесінің төрағасы, салаға қатысты мекеме басшылары, БАҚ өкілдерімен бірге қаланың әлеуметтік қорғау саласы нысандарын аралады.
Ең алдымен депутаттар қалалық жұмыспен қамту және әлеуметтік бағдарламалар бөлімінің жұмысымен танысты. Бөлім жергілікті деңгейде халықты жұмыспен қамту және мемлекеттік, арнаулы әлеуметтік қызметтер көрсетуді үйлестіру бағытында 16 мемлекеттік қызмет түрін көрсетеді.
Депутаттар аралау барысында осал топтағы жандарға әлеуметтік көмек көрсету және мүгедектігі бар адамдарды әлеуметтік қолдау бөлімшелерінің мамандарымен, сондай-ақ қызмет алушы тұрғындармен пікірлесті.
Пікірлесу барысында депутаттар бөлімнің халыққа сапалы қызмет көрсету жұмыстары мен мүгедектігі бар адамдарға арналған екінші қабатқа көтерілгіш құрылғысын орнату туралы ұсынысын назарға алды.
Сонымен қатар депутаттар «Мансап» орталығының ұйымдастыруымен өткен «Бос жұмыс орындары» жәрмеңкесімен танысты.
«Қызылорда қаласының Мансап орталығы» жыл басынан 5 рет «Бос жұмыс орындары» жәрмеңкесін өткізген. Жәрмеңкеге барлығы 107 жұмыс беруші мекемелерден 1401 бос жұмыс орындары ұсынылып, 1553 адамға жолдама беріліп, 252 адам тұрақты жұмыспен қамтылған.
Депутаттар жұмыс іздеуші жастармен, тұрғындармен сұхбаттасып, алдағы уақытта «Бос жұмыс орындары» жәрмеңкесін әлеуметтік желілер мен БАҚ-да кеңінен ақпараттандырып отыру қажеттігін көтерді.
Мұнан соң халық қалаулылары Қызылорда қалалық отбасын қолдау орталығының жұмысымен танысты.
Жыл басынан бері кеңес беру және кешенді сүйемелдеу бағыты бойынша орталық мамандарымен 1026 азаматқа жалпы саны 1058 қызмет көрсетілген. Өмірлік қиын жағдайға тап болған азаматтарға уақытша тұру мүмкіндігін беру арқылы қолдау көрсетіледі. Осыған орай орталықта азаматтарды уақытша орналастыруға арналған арнайы жатын орын мен бейімделген бөлме болуы қажеттігі назарға алынды.
Сондай-ақ орталықтың техникалық базасын нығайтып, ғимаратты күрделі жөндеу мәселесі, өмірлік қиын жағдайға тап болған азаматтардан түсетін өтініштерді қабылдайтын «111» республикалық байланысы және FSM cosial бағдарламасын ақпараттандыру, олардың әлеуметтік жағдайын зерттеу жұмысы да маңызды екені айтылып, ұсыныс берілді.
Сонымен бірге депутаттар зейнеткерлерге жартылай стационарлық жағдайда арнаулы әлеуметтік қызмет көрсету орталығына аялдады.
Мекеме 2009 жылдың қазан айында 10 орындық болып ашылса, 2013 жылдың мамыр айында 50 орындыққа ұлғайтылып, қазір 480-500-ге жуық ардагерге қызмет көрсетуде. Мұнда емдік бөлмелер, дәрі егу, физиотерапия, уқалау, емдік дене шынықтыру бөлмесі, акт залы, кітапхана бөлігі, психология бөлмесі, асхана бар.
Депутаттар орталықта қызмет алушы ардагерлермен, сала мамандарымен кездесіп, орталықтың қызмет аясын кеңейту, материалдық-техникалық базасын нығайту, ардагерлердің қоғамдық көлікте жеңілдікпен жүруін қарастыру жөніндегі ұсыныс-пікірлерін тыңдады.
Депутаттардың назарына алынған мәселелер, ұсыныс-пікірлер шешім жобасына енгізіліп, қалалық мәслихаттың кезекті сессиясында қаралатын болады.
Г. АСҚАРҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!