Сыр дарындары – жеңіс тұғырында

Қызылорда облысы білім басқармасына қарасты №9 дарынды балаларға арналған облыстық «Білім-инновация» лицей-интернаты 30 жылдан астам уақыт бойы Сыр өңірінің талапты да талантты жасөспірімдерінің қабілетін шыңдап, жаратылыстану-математикалық бағыттағы білім беру ісіне сүбелі үлес қосып келеді. Білім ордасының басты миссиясы – отандық және халықаралық озық тәжірибеге сүйене отырып, құндылықтарды бойына сіңірген, бәсекеге қабілетті әрі жан-жақты дамыған тұлға қалыптастыру арқылы еліміздің адами капиталының өсуіне үлес қосу. Осы ұстанымды берік ұстанған лицей ұжымы оқушыларға сапалы білім мен саналы тәрбие беруде тынымсыз еңбек етіп келеді.

Лицей-интернатта олимпиада­ға жүйелі даярлау ісі жоғары деңгейде. Ұстаздар шәкірттерін республикалық және халықаралық білім бәсекелеріне дайындап, нәти­желі жұмыс жүргізудің арқа­сында жыл сайын жоғары жетіс­тіктерге қол жеткізуде. Соның айқын дәлелі – жаратылыстану-математикалық бағыттағы респуб­ликалық олимпиадалар қорытын­дысы бойынша лицей бірнеше жыл қатарынан еліміздегі 8000-нан астам мектептің ішінен алғашқы ондыққа еніп, биылғы рейтингте 8-орынға көтерілуі.

Биылғы жетістік – Қызылорда облысының олимпиада тарихында тұңғыш рет республикалық олим­пиадалық команда резервіне бес оқушының шақырылуы. Атап айт­қанда, биология пәнінен Иса Хафиз, физика пәнінен Ларбада Теңізбаев, информатикадан Ман­сұр Мамадахунов, математикадан Арнұр Аңсатов және химия пәнінен Теңізбаев Арен Қазақстанның республикалық олимпиада құра­масына енді. Бұл – дарынды оқу­шылардың дүниежүзілік олим­пиадаларға қатысуына жол ашатын үлкен мүмкіндік.

2026 жылдың 18-24 наурызы аралығында Қостанай қаласын­да математика мен информа­тика пәндері бойынша республика­лық олимпиада өтіп, оған еліміз­дің түкпір-түкпірінен 310 оқушы қатысты. Сондай-ақ 21-25 нау­рыз күндері Астана қала­сында физика және биология пән­де­рінен республикалық пәндік олим­пиаданың қорытынды кезеңі өтті. Осы білім додаларында Сыр елінің үмітін арқалаған Сейілбек Шаухаманов атындағы облыстық дарынды балаларға арналған «Білім-инновация» лицей-интер­на­тының оқушылары жоғары дайындық деңгейін көрсетіп, жүл­делі орынды иеленді.

Республикалық олимпиада қо­рытындысы бойынша информа­тика пәнінен 11-сынып оқушысы Мансұр Мамадахунов алтын ме­дальға ие болса, 9-сынып оқушысы Кенжебек Шәдібай қола медаль жеңіп алды. Математика пәнінен 11-сынып оқушысы Арнұр Аңсатов алтын медаль иеленді. Математика пәні бойынша 11-сынып оқушысы Асқар Мұхтарұлы мен 9-сынып оқушысы Баймұхаммед Ибрагим қола медаль еншіледі. 9-сынып оқушысы Ерасыл Төлепбаев Алғыс хатпен марапатталды. Физика пәнінен 9-сынып оқушысы Ларбада Теңізбаев алтын медаль жеңіп алса, 10-сынып оқушы­лары Нұрасыл Сейлханов мен Ағзам Ермахан қола медаль иегері атанды. Биология пәнінен 9-сынып оқушысы Хафиз Иса алтын медальға қол жеткізді. Осы пән бойынша 9-сынып оқушы­сы Өмірбек Аян күміс медаль иеленсе, 11-сынып оқушысы Қасымжомарт Назаров Алғыс хатпен марапатталды. Химия пәні­нен Арен Теңізбаев күміс медаль жеңіп алды.

Бұл жетістіктер – дарынды шәкірттердің талмай ізденуі мен ұстаздардың кәсіби шеберлігінің жемісі. Білім мен бәсекенің биік белесінде топ жарып жүрген лицей оқушылары Сыр өңірінің ғана емес, тұтас елдің мақтанышына айналып отыр.

София Хайрулла

Жылдам ақпарат алу үшін Facebook, Instagram желілері мен Telegram каналымызға жазылыңыз!