Қалада қордаланған мәселенің бірі болған – Өсербаев көшесі. Күндік және сағаттық жалға берілетін пәтер саны жүздеп саналатын бұл аумақта құқықбұзушылық көп еді. Қоғамдық орында алкоголь тұтыну, түн тыныштығын бұзу секілді оқиға көп мұнда. Міне, осы құқықбұзушылықтың алдын алу мақсатында Өсербаев көшесіне арнайы стационарлық модульдік бекет орнатылды. Бұл өз кезегінде біраз құқықбұзушылықтың алдын алуға елеулі үлес қосуда. Полицияның табанды да тыңғылықты жұмысымен арнайы барып танысып, кешкі уақыттағы «Өсербаев» көшесінің ахуалын білдік.
Облыстық полиция департаменті және қалалық полиция басқармасы түйінді мәселені шешуді қолға алып, жақында тұрғындар тыныштығын қамтамасыз ету мақсатында стационарлық полиция бекетін орнатты. Қазіргі таңда бекет тәулік бойы қала тұрғындарының тыныштығын күзетуде. Стационарлық бекетте үш ауысыммен екі қызметкер кезекшілік етіп, аумақ тәртібін қадағалайды. Стационарлық бекет заманауи техникамен жабдықталған, полиция қызметкерлері радиостанциялармен және планшеттермен қамтылған. Бұл аумақта бүгінгі таңда 4 бейнебақылау камерасы жұмыс атқаруда.
− Өздеріңіз білетіндей, Қызылорда қаласындағы жалға беру пәтерлерінің көбі осы аумақта шоғырланған. Сол себептен тыныштықты, спирттік ішімдік тұтыну немесе көшеде масаң күйде жүру фактілері көп тіркеледі. Дегенмен полиция басқармасы мұндай заң бұзушылықты азайту, қауіпсіздікті арттыру мақсатында күндіз-түні жұмыс істеуде. Мысалы, 2017 жылы бұл аумақта 1000-нан аса жалға берілетін пәтер болды. Қазір олардың тек 160-ы ғана бар және әрқайсысы жеке кәсіпкер ретінде тіркеліп, «агенттік» ашып алған. Сондай-ақ түнгі уақытта, яғни 24 сағат жұмыс істейтін дүкендер де бар. Ол жерге де адамдар көп келеді, − дейді қалалық полиция басқармасы жергілікті полиция қызметі бөлімінің учаскелік инспекторы, капитан Нұрлыбек Нұртаев.
Тағы бір қуанарлық жайт, Өсербаев көшесі тұрғындар өтініші бойынша Қорқыт ата − Әйтеке би көшесіне қарай көлік қозғалысы бір бағытқа ауыстырылды. Арнайы жол белгісі қойылған бұл аумақта алғашқы күндері түсіндірме жұмыстары жүргізіліп, хабарландыру берілген. Одан бөлек бұл аумақта алдағы уақытта 74 бейнебақылау камерасы орнатылмақ. Оның 30-ы жедел басқару орталығына қызмет етеді. Яғни енді аумақтағы құқықбұзушылық полицияның аралауы немесе тұрғындардың хабарлауы бойынша ғана емес, басқару орталығы арқылы да анықталатын болады.
Бұл аймақта қоғамдық қауіпсіздікті қамтамасыз ету үшін 24 сағат бойы 6 учаскелік және 2 ювеналды полиция қызметкері жұмыс атқарады. Жол жүрісінен бастап, қоғамдық тәртіп пен тыныштықты бұзғандардың барлығы жауапқа тартылады. Мәселен, ұсақ бұзақылық жасағандар 434-ші бап бойынша жауапқа тартылып, 5 АЕК айыппұл арқалап немесе он тәулікке дейінгі мерзімге қамаққа алынуы мүмкін. Ал 437-ші бап бойынша 22.00 мен 09.00 аралығында тыныштықты бұзған жеке тұлғаға 5 АЕК, шағын кәсіпкерлік субъектіге 20 АЕК, орта кәсіпкерлікке 30 және ірі кәсіпкерлікке 100 АЕК көлемінде айыппұл салынады. Сонымен қатар Өсербаев көшесінде көп кездесетін қоғамдық орында алкоголь ішу немесе масаң күйде келу дерегі бойынша 440-шы бапқа сәйкес 5 АЕК көлемінде айыппұл арқалайды.
− Өсербаев көшесіне жол белгісінің қойылғанына екі апта уақыт болды. Алдын ала жан-жақты хабарландыру жасалып, бастапқы кезеңде түсіндірме жұмыстары жүргізілді. Біздің мақсат хаттама толтыру емес. Сол себептен мүмкіндігінше жүргізушілерге түсіндірме жасап, кері бұрылуын талап етіп жатырмыз. Одан бөлек аумақты бақылау, қылмыстың алдын алу мен әкімшілік құқықбұзушылық секілді фактілермен жұмыс істейміз. Бұл аумақта 437 бап бойынша, яғни тыныштықты бұзу бойынша хабарлама көп түседі. Бүгін біз ІІ ауысымда жұмыс істейміз, 19.00 мен 03.00 аралығында аумақ қауіпсіздігін қамтамасыз ету міндеті бізге жүктелген, − дейді жол патрульдік полициясының қызметтік инспекторы Дәуірбек Қыдырбекұлы.
Аслан НҰРАЗҒАЛИ
Жылдам ақпарат алу үшін Facebook, Instagram желілері мен Telegram каналымызға жазылыңыз!